गुता बूबःया त्वनेगु साःगु ज्वलं क्वाति

विस्कं विस्कं अर्थ दुगु निगः खँग्वः क्वाः व ती स्वाना दयेकातःगु मंका खँग्वः क्वाती खः । क्वाः धइगु क्वाःगु ज्वलं व ती धइगु झोल, थुपिं निगः खँग्वःया मंका खँग्वः क्वाती खः । क्वाती गुँलाया पुन्हि अथेधइगु गुँपुन्हि कुन्हु विशेषयाना नेवाः समुदायं त्वनेगु यानावच्वंगु खनेदु । थज्यागु क्वाःगु त्वनेगु ज्वलं गब्लें निसें त्वनेगु यात धैगु ऐतिहासिक दसू आः तक मलूसां परापुर्व कालनिसें नेपाः गाःया नेवाःतयेसं आःतक त्वना वःगु धइगु यक्वः मनूतयेगु धापु दु । ई कथं थीथी नखःचखः हना ई ल्वयेक थीथी नसा ज्वलं नयेसःपिं नेवाःतयेसं त्वनेगु यानावःगु क्वाती थौं कन्हय् गैर नेवाः समुदायया मनूतयेसं न यक्वः हे त्वनेगु या । कारण साःगुलिं जुइमा ।

विशेषयाना इमूचा चिकं व घ्यलय् क्वयेका झ्वायँ याना त्वनेगु साःगु ज्वलं क्वाती, मचा बूपिं मिस्तयेत ला वासः हे खः । थज्यागु वासः थें जाःगु त्वनेगु ज्वलं जूगुलिं न विशेषयाना गुँपुन्ही कुन्हू त्वनेगु यानावःगु जुइमा । क्वाती सम्भव दूतले थीथी बुबः ल्वाकछ्याना दायेका त्वनी । धायेत ला क्वाती दयेकीबले गुता बुबः तयेमा धाइ । तर गुता हे दयेमा धइगु न मदू । बजारय् लू कथं माय्, मु, सिमि, भुटी, मुस्यांचा, चना, बकुला नापनापं थीथी बुबःत तया क्वाती दायेकी । गनगन क्वातीनापं छुचूँ मरी न नयेगु या । थथे जुयांन थुगु नखःयात छुचूँया नखः धायेगु या । विशेषयाना सीना न याये माःगु ज्या अथेधइगु सिनाज्या क्वचायेका म्हय् तागत तनेत किसान समुदायया मनूतयेसं क्वाती त्वनेगु यानावःगु धइगु छथ्वः मनूतये धापु दुसा क्वाती इमूचा तइगु जूगुलिं प्वाः स्याइगु नाप मेमेगु ल्वचं कैमखु धइगु जनविश्वास न अथेहे दु ।

सा“स्कृतिक विविधता दुगु नेवाः समुदायय् दुनेया थुगु दिं ब्याचित जा नकेगु दिंया कथं न नालिइ । वर्षाया ई बुँईं मेहनतिं ज्या याना अन्नबाली सयेकेगु ई खः । बुईं ज्या याइब्ले ब्याँचा बुज्याय् ग्वहालि यानाबिइगु जनविश्वास कथं थुगु दिं ब्याँयात भ्वय् ज्वलं नाप जा नके हनेगु याइ नेवाः किसानतय्सं । थथे जुयां न ब्याँचित बुइँ मालामाला भ्वय् नकी ।

क्वाती त्वनेगु व ब्यां चित नकेगु ज्याय् जक सिमित मजू गुँपुन्हि । थुगु हे दिं स्वयम्भूइ गः चहिलेगु न परम्परा दु । थुगु दिं स्वनिगःया मनूत गुँलाबाजं अथेधयागु नाय्खिँ व धा बाजं थाना सुथय् निसें बौद्धमार्गी नेवाःत वाहाः व बहिलय् चाः ह्यू वनेगु याइ ।

म्वाः मदुगु संस्कार व संस्कृतियात बुलुं हिला वैज्ञानिक आधार दुगु परम्परायात म्वाकातयेगु आःया आवश्यकता खः । गुंलाथ्व पुन्हिकुन्हु क्वाती त्वनेगु चलन थज्यागु हे आधार दुगु छगु महत्वपूर्ण परम्परा खः ।

News Location:

Related Stories

गुन्हुपुन्हि हनाच्वन

More Stories Like this

मेरिल्याण्डय् लाखय् व पुलुकिसिलिसे हन येँयाः
स्यस्यः समाजं सत्यमोहन जोशीयात हन
मूलयात ग्वाहालि लःल्हात
मेहेन्दी च्वयेगु कासा जुइगु
मचातयत मां भाय् स्यनेगु संस्था नीस्वन