आदिवासी जनजाति संयुक्त संघर्ष समितिया बृहत्त सम्मेलनपाखें घोषणा पत्र जारी

न्हापांगु विकल्प ‘सर्वपक्षीय गोलमेच सभा’

येँ (झीगु स्वनिगः)

१८ क्वःगु विश्व आदिवासी दिवसया लसताय् आदिवासी जनजाति संयुक्त संघर्ष समितिया ग्वसालय् म्हिगः बुधवाः येँय् जूगु वर्तमान रानीतिक संकट व निकास विषययात कयाः जूगु बृहत्त सम्मेलनं ४ बुँदाया घोषणा पत्र जारी याःगु दु । उगु घोषणा पतिइ संविधानसभा अवसान जूगुया कारण धैगु संविधानसभापाखें न्हूगु संविधान, संविधानसभा व राज्य पुनर्संरचना थःगु पार्टीया एजेण्डा हे मयाःगु दलतय्सं यानाः हे खः धासें इपिं हे मूल रुपं जिम्मेवार खः धकाः न्ह्यथनातःगु दु । अथे हे जनताया नितिं, जनतापाखें हे जनताया संविधान दयेकेगु नेपाःमि जनताया अधिकार व अभिष्टता खः, उकिया बटम लाईन धैगु थः निर्वाचन प्रतिनिधि व निकासपाखें संविधान दयेकेगु खः । उकिं संविधान निर्माण व संविधानसभाया निर्वाचनयात सहज दयेकेत राजनीतिक सहमति ब्वलंकेमाःगु थौंया आवश्यकता खः धकाः न्ह्यथसें उकिया नितिं निगू विकल्प थुगु कथं न्ह्यथनातःगु ः विकल्प नं. १. क) स्वंगू दलया सहमतिपाखें आः राजनीतिक निकास वइगु अवस्था मदु ।

उकिं सर्वपक्षीय गोलमेच सभा÷सम्मेलन यायेमाः । उकिया नितिं २०६४ सालया संविधानसभाया चुनावय् ब्वति काःगु व २०६२÷०६३ सालया जनआन्दोलनया भावना व लक्ष्य ज्वंगु आन्दोलनकारी, सक्रीय गणतन्त्रवादी, धर्म निरपेक्षतावादी, संघीयतावादीसहितया राज्य पुनर्संरचनाया पक्षया दलतय्त सहभागी याकेमाःगु, उगु गोलमेच सभापाखें निर्वाचनसम्वन्धी अन्तरिम संविधानया पंगः धारात संशोधन व ऐन निर्माण, संसद्या ज्या तकं यायेगु कथं चीधंगु संविधानसभाया निर्वाचन, अन्तरिम संविधान संशोन प्रक्रिया, निर्वाचनया मेगु मिति तयार यायेगु, जेठ १४ गतेया अवस्थापाखें संविधान निर्माणया ज्या न्ह्याकेमाःगु व राष्ट्रिय सहमतिया अन्तरिम सरकार गठन लगायतया विषययात कयाः सहमति यायेमाःगु नापं उकिया नितिं नेपाल सरकारं ग्वसाः ग्वयेमाःगु खँ न्ह्यथनातःगु दु । अथ हे उगु घोषणापतिइ विकल्प नं. २ धकाः गोलमेच÷सर्वपक्षीय सम्मेलनय् आदिवासी जनजाति व मधेसीतय्गु माग कथं जाति÷समुदायया पहिचानसहितया संघीयता, आत्मनिर्णय, अग्राधिकार व प्रदेश÷क्षेत्र स्वशासन नापं स्वायत्त अधिकार, प्रदशेयात अविशिष्ट अधिकार, मिसा, दलित व मुस्मांतय्त विशेषाधिकार सुनिश्चित यायेगु ग्यारेन्टी यानाः न्हापा हे लिखित रुपं सहमति यानाः राष्ट्रिय सहमतिया चुनावी सरकार गठन यायेगु व संविधान पारित यायेगु औपचारिकताया नितिं जक छवाः÷निवाः लिपा स्वतः अन्त जुइगु कथं संविधानसभाया पुनस्र्थापना यानाः संविधान जारी यायेमाःगु ।

उकिया खुला लिपा संघीय संसद (व्यवस्थापिका)व प्रादेशिक व्यवस्थापिकाया निर्वाचन छक्वलं यायेगु नापं निर्वाचित संसदपाखें न्हूम्ह राष्ट्रपति व न्हूगु सरकार निर्माण यायेगु खँ न्ह्यथनातःगु दु । अथे हे उगु कथंया मार्गचित्र कार्यान्वयन यायेत÷याकेत धर्मनिरपेक्षतावादी, गणतन्त्रवादी, संघीयतावादी, राष्ट्रिय तथा क्षेत्रीय मुक्ति आन्दोलन लगायत प्रतिशिल व क्रान्तिकारी शक्तितय्गु मंकाः मोर्चा दयेकेमाःगु खँ न्ह्यथनातःगु दु । अथे हे आःया अवस्थाय् आदिवासी जनजाति संयुक्त संघर्ष समितिं संविधानसभाया अन्त्य याःपिं उत्पीडितमैत्री संविधान विरोधी तत्वतय्त जनाया कठघराय् थनेत केन्द्रिकृत व विकेन्द्रिकृत भण्डाफोर ज्याझ्वः संचालन यानाः जनतायात सचेत यायेगु, प्रतिगामी शक्तितविरुद्ध अग्रगामी शक्तित, खासयानाः आदिवासी जनजाति, मधेसी, दलित व श्रमजीवीतय्गु छगू ब्यागलं कथंया राजनीतिक शक्ति व वृहत्त संयुक्त मोर्चा निर्माण यायेगु व पुरातनवादी नापं परम्परावादी दलतय्गु कारणं शासक जाति व शासित जातिया दथुइ विभाजित जूगुलिं नेपाली समाजयात भावनात्मक रुपय् एकीकृत यायेगु धकाः नं घोषणापतिइ न्ह्यथनातःगु दु । उगु सम्मेलन संघर्ष सहमतिया नायः नापं ज्यापु महागुथि निदेशन समितिया नायः राजभाई जकःमिया सभापतित्वय् जूगु खः । ज्याझ्वलय् प्रा. परशुराम तामाङं अवधारणा पौ न्ह्यब्वयादी धुंकाः न्यागू पुचलय् ब्वथलाः सहलह ब्याकूगु खः । अनंलिपा अथे घोषणा पौ जारी याःगु खः ।