निकासया नितिं नेपाली कांग्रेसया नेतातय्गु दथुइ विवाद तच्वल
संसदया चुनाव ला कि संविधानसभाया पुनस्र्थापना ?
येँ (झीगु स्वनिगः)
आःया राजनीतिक अन्यौलतायात निकास बिइगु नितिं संविधानसभा पुनस्र्थापना यायेगु ला कि तप्यंक हे संसदया चुनाव यायेगु धैगु विषययात कयाः नेपाली कांग्रेस दुने नेतातय् दथुइ विवाद झन झन तच्वयाः वःगु दु । संविधानसभाया चुनावया माध्यमं संविधानसभा नापं व्यवस्थापिका संसदय् थ्यंपिं पुलांपिं सभासद्तय्सं संविधानसभा पुनस्थापनाया पक्षय् सार्वजनिक रुपं मत तयाः वयाच्वंगु दुसा चुनावय् बूपिं व आःया अप्वः यानाः जिल्ला सभापतितय्सं तप्यंक हे संसदया चुनावय् वनेमाः धकाः बः बियाहःगु दु ।
कांग्रेसया वंगु सोमवाःनिसें सिन्धुपाल्चोकया बाह्रबिसेय् न्ह्याःगु जिल्ला सभापतितय्गु मुँज्याय् अप्वः यानाः जिल्ला सभापतितय्सं तप्यंक हे चुनावय् वनेमाः धकाः मत तयादीगु जूसां बास्तवय् पुलांपिं सभासद्तय्सं धाःसा थःपिनिगु अडान कायम हे यानाच्वंगु अवस्था दु धकाः कांग्रेसया छम्ह पुलांम्ह सभासद्ं धयादीगु दु ।
नेपाली कांग्रेसया ६३ म्ह जिल्ला सभापतित मध्ये ६० म्हेस्यां ला न्हूगु निर्वाचनय् वनेमाः धकाः थःथःपिनिगु मत तयादीगु खः ।
ख्वीम्हेसिया बिचाःसिबें पाःगु कथं स्वम्ह जिल्ला सभापतित येँ जिल्लाया सभापति भीमसेनदास प्रधान, धनकुटा जिल्लाया सभापति अजितनारायण थापा व धनुषा जिल्लाया सभापति रामसरोज यादवं संविधानसभा पुनस्र्थापना यायेमाः धकाः मत तयादीगु खः । वय्कःपिं स्वम्हेस्यां छुं ईया नितिं जूसां संविधानसभा पुनस्र्थापना यायेमाःगु अले पुनस्र्थापना याये न्ह्यः दलतय्गु दथुइ प्याकेजय् हे संविधान निर्माण, न्हूगु सरकार नापं मेमेगु विषययात कयाः सहमति यायेमाःगु अले चुनाव यायेयाःसां छुं पाइमखु धकाः तर्क तयादीगु खः ।
पार्टीया विधान कथं जिल्ला सभापतितय्गु भेला यायेगु व्यवस्था मदुसां याःगु उगु भेलां आः पार्टीया महासमितिया मुँज्या सःतेमाः धकाः माग याःगु दुसा कांग्रेसं प्रधानमन्त्रीया उम्मेदवार तकं घोषणा यायेमाः धकाः माग याःगु दु । थगुने च्वंगु जिल्ला सभापतितय्गु भेलां नं महासमितिया मुँज्याया माग याःगु जूसां कांग्रेसं आः तक नं महासमितिया मुँज्या धाःसा सःतूगु मदुनि ।
