प्राइम लाइफपाखें पत्रकारतय्त सामुहिक बीमा

येँ (झीगु स्वनिगः)

प्राइम लाइफ इन्स्योरेन्स कम्पनीं थीथी सञ्चारमाध्यमतय्के ज्यायानावयाच्वंपिं श्रमजीवी आर्थिक पत्रकारतय्त सामूूहिक दुर्घटना बिमा यागु दु  । पत्रकारतय्त कार्यस्थलय् जुइगु जोखिमया विरुद्ध सुुरक्षा बीगु आज्जुं प्राइम लाइफ इन्स्योरेन्स कम्पनीं नेपाल आर्थिक पत्रकार संघ (नाफिज)लिसेया सहकार्यय् पत्रकारपिंत निगु लख तकया दुर्घटना बिमा उपलब्ध याकूगु खः । सोमवाः मुुख्य ज्याकू हात्तीसारय् जूगु छगू ज्याझ्वलय् कम्पनीया प्रमुख कार्यकारी अधिकृत रेस्ता झां नाफिजया नायः शुकदेव चापागाईँयात पत्रकारतय्गु मंकाः दुर्घटना बिमाया बिमालेख लल्हात । थीथी पत्रपत्रिका, रेडियो, टेलिभिजन अले अनलाइनय् ज्या यानाच्वंपिं ८१ म्ह आर्थिक पत्रकारतय्गु मंकाः दुर्घटना बिमा सम्बन्धी बिमालेख लःल्हागु खः ।

ज्याझ्वलय् प्रमुख कार्यकारी अधिकृत झां थःपिंसं संस्थागत सामाजिक उत्तरदायित्व पूवंकेगु अले समग्र आर्थिक पत्रकारितायात समेत ग्वाहालि जुइगु हेतुं मंकाः बिमालेख लःल्हानागु धयादील । अथेहे नाफिजया नायः शुुकदेव चापागाईँं आर्थिक क्षेत्रय् ज्यायानाच्वंपिं पत्रकारततय्गु जोखिम म्हो यासें वय्कपिनिगु हकहितया अभिवृद्धि यायेत नाफिज न्ह्याबलें क्रियाशील जुइगु बचं प्वंकादील । अथे हे नाफिजया मू छ्याञ्जे इन्द्र बानियांँ पितब्यूगु प्रेस विज्ञप्तिइ नं थःगु सस्थालिसे स्वापूदुपिं पत्रकारतय्त दुर्घटना विमा दुगु न्ह्यथनातःगु दु ।