विमानस्थल भारतीय कम्पनीयात मबिइत आदेश
येँ (झीगु स्वनिगः)
नेपाःया सुरक्षा नापं हरेक दृष्टिकोणं तकं सम्वेदनशील कथं नालातःगु त्रिभुवन अन्तर्राष्ट्रिय विमानस्थल भारतीय कम्पनीयात लःल्हानाः नेपाःया कामचलाउ प्रधानमन्त्री डा. बाबुराम भट्टराई नं नेपाःया सर्वभौमसत्ताय् हे खेलवाद यात धकाः प्यखेरं धयाः हयाच्वंगु नापं विरोध यानाः वयाच्वंगु अवस्थाय् उगु ज्या यात मन्ह्याकेत सर्वोच्च अदालतं आदेश ब्यूगु दु ।
सर्वोच्च अदालतं त्रिभुवन अन्तर्राष्ट्रिय विमनस्थलया व्यवस्थापन सम्वन्धी जिम्मा कानुनया अःखः भारतीय कम्पनीयात बिइत्यंगु खने दत धकाः तत्काल हे उगु ज्या दिकेत आदेश ब्यूगु दु ।
सर्वोच्चय् थुगु विषययात कयाः रिट दायर जूगु खःसा सुनवाईया झ्वलय् म्हिगः आइतवाः उगु कथं आदेश ब्यूगु खः ।
स्वम्ह दुजः दुगु इजलासय् निम्ह थुगु आदेशया पक्षय् व छम्ह थुगु आदेया अःखः दंगु खः ।
कानुन कथं प्रतिस्पर्धा याकाः जक व्यवस्थापनया जिम्मा बिइकेमाःगु खःसां सरकारं विना प्रतिस्प्रर्धा भारतीय कम्पनी आइएलएन्डएफएसयात बिइत्यंगु खनेदुगुलिं बहुमतया आधारय् अथे आदेश जारी याःगु खः ।
सर्वोच्च अदालतया मंकाः इजलासया न्यायाधीशपिं सुशीला कार्की व तर्कराज भट्टं कानुन मिचेयानाः व्यवस्थापनया जिम्मा बिइत्यन धकाः उकियात दिकेगु आदेशया फैसला यानादीगु खःसा मेम्ह न्यायाधीश राजकुमार प्रसाद शाह नं धाःसा व्यवस्थापन जिम्मा बिइ त्यंगु खः ला कि मखु धकाः स्पष्ट हे मजूनिगुलिं धकाः फैसलाया राय बाझेयाःगु खः ।
न्यायाधीशपिं कार्की व भट्टं मुलुकया सार्वभौम सुरक्षाय् आँच वइगु जूगुलिं सरकारी तयारी दिकेत आदेश बियादीगु खः । निम्ह न्यायाधीशया बहुमतं फैसला याःगु यात हे मान्यता बिइगु प्रावधना दु ।
