मिस ज्यापु ज्याझ्वःलिसे जिगु अनुभव

विद्यालक्ष्मी महर्जन
(नेपालमण्डल डट कमया अनलाइन भोटिङपाखें मिस भ्यूअसर्स च्वाइस अवार्ड त्याकादीम्ह मय्‌जु)

मिस ज्यापु धेंधें बल्लाः कासा झीगु लोप जुया वनेत्यंगु ज्यापु संस्कृति सम्पदा तजिलजि व झीगु भाषायात निरन्तरता बिइगु कथं जिपिं व लिपांगु पुस्तातय्‌त थःगु पहिचान निरन्तरता यायेगु लागि न्ह्याकूगु कासा खः । मेमेगु धेंधें बल्ला कासा थें सौन्दर्य व ग्लाय्‌मरय् जक सिमित मदु । थ्व ज्याझ्वः या विषेशता धैगु झीगु भाषा तजिलजि म्वाका तयेगु कुतः खः ।

जिं थ्व धेंधें बल्लाः कासाय् ब्वति कयाः मिस ज्यापु टाइटल मत्याःसां भ्यूअर्स च्वाइस अवार्ड लाना दुनुगलंनिसें सिक्क हे लय्‌ताः । मिस ज्यापु धेंधें बल्ला कासाय् वयाः झी ज्यापुत बुँइ ज्या याइपिं जक मखु हरेक ख्यलय् नं थ्यं धैगु थप पुष्टि याये खन थें च्वं । थ्व हे ज्याझ्वः मार्फत ज्यापु धैगु जात मखु सभ्यता खः धैगु खँनिसें कयाः ज्यापुतय्गु लवःकवः. बुँइ ज्या यायेगु, नसात्वँसा दयेकेगु, बजि ल्हुइगु अय्‌लाः कायेगुनिसें आदि खँ सयेके खन । शायद थुगु ज्याझ्वलय् ब्वति मकाःगु जूसा जिं थुलि सयेके मखनीगु जुइ ।

थुकिया लिसे थःके दुगु प्रतिभा ब्वयेत व आत्मविश्वास थकायेत नं मिस ज्यापु ज्याझ्वलं ग्वहालि यात । जिं सयेकागु गुलि नं खँत दु व दक्वं जि थःके जक सीमित मयासें झीगु पहिचान व झीगु भाय्‌या महत्व बारे जनचेतना थनाः व्यापक प्रचारप्रसार यायेगुपाखे जि न्हयाबलें अग्रसर जुयाच्वने ।

More Stories Like this