स्नेहा न्हापांगु चरणं पिहांवन

Posted on Sat Jul 28, 2012 9:34 pm NST

लण्डनय् न्ह्यानाच्वंगु स्वीक्वःगु ग्रीष्मकालीन ओलम्पिक कासा अन्तरगत सुटिङ्गय् नेपाःया स्नेहा राणा न्हापांगु चरणं हे पिहांवंगु दु ।

१० गू मिटर एयर राइफलय् ५६ म्ह कासामित मध्ये राणा ५४ गू थासय् लायेवं पिहांवंगु खः । कतारया दोहाय् वंगु जनवरीइ क्वचाःगु एसियन सुटिङ्ग च्याम्पियनशीपय् ३८८ या स्कोर यासें वाइल्डकार्ड पाखें लण्डन ओलम्पिकया लागि छनौट जूगु खः ।

लण्डन ओलम्पिकय् नेपाःया न्याम्ह कासामितय्सं ब्वति कयाच्वंगु दु । नेपाःपाखें स्नेहाया नापनापं पौडीइ श्रेया धिताल व प्रशिद्धजंग शाह एथलेटिक्सय् प्रमिला रिजाल व तिलकराम थारुं ब्वतिकयाच्वंगु दु ।

लण्डन ओलम्पिकय् सहभागी जूगु देशया कासामितय्सं २६ गू कासाया ३०४ गू इभेन्ट्सय् पदकया लागि धेंधेंबल्ला यानाच्वंगु दु ।