मिसा फुटबल कासाया उपाधि एपीएफयात

१४क्वःगु राष्ट्रिय मिसा फुटबल कासाया उपाधि सशस्त्र प्रहरिया एपिएफ क्लबं त्याकूगु दु ।

शनिवाः बाराया सिमराय् जूगु बिजं कासाय् मेगु विभागीय पुचः नेपाल पुलिस क्लबयात छगूया विरुद्ध निगू गोलं बुकाः उगु उपाधि त्याकूगु खः । उपाधिया नापनापं एपीएफं स्वंगू लख तका सिरपाः नं त्याकूगु दु । उपविजेताय् चित्त बुझे यायेमाःगु पुलिस क्लबं छगू लख न्यय्द्वः तका सिरपाः कथं त्याकल ।

कासाया १७ गू मिनेटय् चन्द्रा भण्डारीया गोलं न्ह्यःने लाःगु पुलिस क्लबं उकियात ल्यंकातये मफयेवं १४ दँ लिपा उपाधि त्याकेगु ह्वःताः त्वफिेकेमाःगु खः । लिपांगु खुसी पुलिसं २०५५ सालय् जूगु च्याक्वःगु संस्करणया उपाधि त्याकूगु खः ।

कासाया ४३ गू मिनेटय् जमुना गुरुङ्गं एपीएफया लागि गोल यासें कासा बराबरीइ हःगु खः । अथेहे एपीएफया लागि अनु लामां ७५ गू मिनेटय् गोल याःगु खःसा थ्वहे गोल कासाया निर्णायक गोल जूवंगु खः ।

एपीएफया लागि थुगु उपाधि लगातार प्यक्वःगु खः । उगु क्लबं झिगूगु संस्करण निसें थुगु उपाधि त्याका वयाच्वंगु दु ।

अथेहे सेमीफाइनलय् थ्यंगु कैलाली व नेपाल आर्मी क्लबं ५०/५० द्वः तका सिरपाः त्याकूगु दु ।

अखिल नेपाल फुटबल संघया ग्वसालय् वंगु असार ३० गतेनिसें बारा व रौटहटय् जूगु कासाय् स्वंगू विभागीय टीमया लिसें २४ गू जिल्लापाखें २७ गू टीमया ब्वति दुगु खः ।

More Stories Like this