थःपिनिगु दलयात चीनं राष्ट्रवादी शक्तिया रुपय् काःगु दु : किरण
येँ (झीगु स्वनिगः)
नेकपा—माओवादीया नायः मोहन बैद्य किरणं थःपिनिगु दलयात चीनं राष्ट्रवादी शक्तिया रुपय् काल धकाः दावी यानादीगु दु । चीन भ्रमणया बारे जानकारी बिइगु नितिं म्हिगः विहिवाः पार्टीया केन्द्रीय ज्याकु बुद्धनगरय् याःगु पत्रकार सम्मेलनय् नेता किरणं अथे दावी यानादीगु खः । वय्कलं धयादिल ‘चिनियाँ कम्युनिष्ट पार्टीं जिमिगु पार्टीयात सही संगठन, राष्ट्रिय स्वाधिनताया रक्षाय् दृढतापूर्वक न्ह्यां वंगु व जनताया सेवाय् समर्पित पार्टीया रुपय् काःगु दु ।’
चिनियाँ कम्युनिष्ट पार्टीया नेतातय्सं ‘पार्टी तमज्याःगु जूसा ज्यूगु खः’ धकाः न्ह्यथसें न्हूगु पार्टी जुइ धुंकूगु अवस्थाय् निगू पार्टीया दथुइ घनिष्ट स्वापू दयेकाः वनेगु विषययात कयाः सहमति जूगु दु धकाः नं दावी यानादिल ।
वय्कलं धयादिल ‘ब्यागलं जुयाः न्हूगु पार्टी दयेके धुंकूगु अवस्थाय् घनिष्ट स्वापू दयेकाः यंकेगु जुइ । भ्रमण निगू देय्या दथुइ स्वापू न्हूगु उचाई व आयाम थपेयाःगु दु ।’
जातीय पहिचानया आधारय् संघीयताय् वनेमाः धैगु थःपिनिगु धारणा स्पष्ट दु धयादिसें वय्कलं संघीयतां देय् कुचा मजुइगु नापं कुचा जुइगु कथं थःपिं वनेगु नं जुइमखु धकाः स्पष्ट यानादिल ।
अथे हे चीनं संघीयताया सवालयात कयाः गुगु कथं काःगु दु धैगु पत्रकारतय्गु न्ह्यसःया लिसः बिइगु झ्वलय् वय्कलं नेपाःया विशिष्टताया आधारय् जातीय पहिचानया आधारय् हे संघीयताय् वनेमाःगु नापं थ्व नेपाःया विशिष्टाताया आधारय् खः धकाः चीनयाँ कम्युनिष्ट पार्टीया नेतातय्त धयागु खँ न्ह्यथसें नेपाःया आन्तरिक मामिलाय् चीनं गबलें नं हस्तक्षेप याःगु मदु अले संघीयताया सवालय् नं याइमखु धकाः धयादिल ।
नेकपा—माओवादीया नायः मोहन बैद्य किरणं चीनपाखें नेपाःया संघीयताया नामय् विदेशी चलखेल चाहेयाःगु मदु धकाः नं धयादिल ।
वय्कलं चिनियाँ कम्युनिष्ट पार्टीया विदेश विभागया निमन्त्रणाय् चीन भ्रमणय् वनाः लिहां झायादीगु खः । नेता किरणं चीनया विदेश विभाग प्रमुख वाङ व कम्युनिष्ट नेता आइ पीङलिसे भेटवार्ता यानादीगु खः । इमिसं नेपालय् शान्ति व स्थिरता चाहाना याःगु खः धकाः तकं नेता किरणं कनादीगु दु । वय्कः वंगु असार ३१ गते चीनय् वनादीगु खःसा अन झिन्हु तक भ्रमण यानाः म्हिगः विहिवाः जक नेपालय् लिहां झायादीगु खः ।
