स्वंगू दलया निर्णायक वार्ता निष्कर्षविहिन
एमाओवादीया प्रस्ताव अस्विकार
येँ (झीगु स्वनिगः)
संविधानसभा विघटन लिपाः ब्वलंगु वर्तमान राजनीतिक अन्यौलतायात निकास बिइगु नितिं धकाः प्रमुख दलया नेतातय्सं कुतः यानाच्वंगु ता ई दये धुंकूगु दु । आःया अवस्थाय् मुलुकयात राजनीतिक निकास बिइगु नितिं धकाः नेपाली कांग्रेस व नेकपा (एमाले)पाखें म्हिगः बुधवाः एकीकृत नेकपा (माओवादी)लिसे याःगु निर्णायक धाःगु वार्ता विनानिष्कर्ष क्वचाःगु दु । एमालेया केन्द्रीय ज्याकू बल्खुइ उगु स्वंगू राजनीतिक दलया शीर्ष नेतातय्गु दथुइ वार्ता याःगु खः ।
वार्ताय् एकीकृत माओवादीया नायः पुष्पकमल दाहाल प्रचण्डं संविधानसभाया चुनाव मंसीर ७ गते याये मफैगु जुयाः लिछ्यायेत प्रस्ताव तयादीगु दु । प्रचण्डया उगु प्रस्तावयात कयाः कांग्रेस व एमालेया नेतातय्सं अस्वीकार यानादीगु खः ।
कांग्रेस व एमालेया नेतातय्सं आःया अवस्थाय् दक्ले न्हापां प्रधानमन्त्री डा. बाबुराम भट्टराई नं राजीनामा बिइमाःगु अले राष्ट्रिय सहमतिया सरकार दयेकाः जक चुनाव घोषणा यायेमाः धकाः अडान तःगु खः ।
वर्तमान राजनीतिक अन्यौलतायात ज्यंकेगु नितिं प्रमुख स्वंगू दलया नेतातय्गु दथुइ न्हूगु हे कथं वार्ता सुरु जूगु दु धकाः उगु पार्टीया नेतातय्सं दावी यानादीगु दु । तर म्हिगःया उगु वार्ताय् सहमति धाःसा याये मफत । आः निरन्तर रुपं वार्ता यायेगु जुइ धकाः धाःगु दु ।
‘‘चुनाव लिछ्यायेगु’
सरकारं क्वःछिनातःगु संविधानसभाया चुनाव आः याये मफैगु ठहर यानाः छुं ईया नितिं चुनाव लिछ्यायेगु निर्णय याःगु दु । म्हिगः बुधवाः प्रधानमन्त्री निवास वालुवाटारय् च्वंगु सरकारय् दुथ्यानाच्वंगु दलतय्गु मंकाः मुँज्यां मंसिर ७ गते चुनाव याये मफैगु ठहर यानाः चुनाव लिछ्यायेगु निर्णय याःगु खः ।
सदभावना पार्टीया नायः नापं स्वास्थ्य मन्त्री राजेन्द्र महत्तों मुँज्यालिसे संचारकःमितलिसे खँल्हासें धयादिल ‘गुलि ई लिछ्यायेगु धैगु विषययात कयाः प्रतिपक्ष दलतलिसे छकः सहलह ब्याकाः फयां फत्तले सहमतिया आधारय् हे निर्णय यायेगु जुइ ।’
निर्वाचन आयोगं ऐन कानुन व चुनावया नितिं अन्तरिम संविधान संशोधनया ज्या क्वचायेकेत सरकारयात ब्यूगु म्यादया दुने माःगु कथं प्रक्रिया न्ह्याके मफुगुयात कयाः आयोगं प्रमुख दल नापं सरकारलिसे सहलह ब्याकेगु ज्या तकं याये धुंकूगु दु ।
उखे प्रतिपक्ष दल कांग्रेस व एमालें धाःसा वर्तमान सरकारया राजीनामा माग यानाः आन्दोलन यायेगु नितिं आन्तरिक रुपं तयारी याःगु दु ।
