मुखर्जीपाखें भारतया १३म्ह राष्ट्रपतिया सपथ ग्रहण

प्रणव मुखर्जी भारतया १३ औं राष्ट्रपति जुयादीगु दु । थौं सुथसिया ११:३० ताः इलय् भारतया मुख्य न्यायाधिस एसएच कपाडियां संसदया सेन्ट्रल हलय् मुखर्जीयात १३म्ह राष्ट्रपतिया कथं सपथ याकूगु खः । लिपा वय्कःयात २१ गू तोपया सलामी नं बिउगु खः । उगु सपथ ग्रहण समारोहस उपराष्ट्रपति हामिद अन्सारी, प्रधानमन्त्री डा. मनमोहन सिंह, लोकसभाया नायः मीरा कुमार व संयुक्त प्रगतिशिल गठबन्धनया प्रमुख सोनिया गान्धी लिसेंया उपस्थिति दुगु खः ।

सपथ ग्रहण लिपा सम्बोधन यानादिसें भारतया नवनिर्वाचित राष्ट्रपति मुखर्जीं गरिबी मदयेका छ्वयेगु देशया दक्कलय् तःधंगु हाथ्या जूगु धयादीगु दु ।

पद व गोपनियताया सपथ लिपा थःगु न्हापांगु सम्बोधनय् राष्ट्रपति मुखर्जीं आधुनिक भारतया शब्दकोषय् गरिब थें जाःगु खँग्वःयात छुं नं थाय् दयेकेमजिउगु धयादिल । गरिबी मदयेका छ्वयेगु भारत सरकारया राष्ट्रिय मिशन जुइमाःगु धयादिसें भोक स्वयां तःधंगु अपमान छुं नं मदुगु नं राष्ट्रपति मुखर्जीं धयादिल ।

सम्बोधनया झ्वलय् हिलंन्यंक हे चरमपन्थीत अप्वयावंगु धयादिसें आः नं युद्धया युग क्वमचानीगु धयादिल । वय्कलं स्वंगूगु विश्वयुद्ध शीतयुद्ध खःसा प्यंगूगु युद्ध धइगु आतंकवाद विरुद्धया युद्ध जूगु नं दावी यानादिल ।

बुधवाः सपथ ग्रहण याये न्ह्यः मुखर्जी सुथसिया जःछिपाः ११ ताः इलय् राष्ट्रपति भवन थ्यंकादीगु खःसा निवर्तमान राष्ट्रपति प्रतिभा पाटिललिसे नापलानाः सपथया लागि निम्हं संसद भवन थ्यंकादीगु खः ।

More Stories Like this