अन्ततः यलया घोविघाटय् सुकुम्वासी मतैगु जुल

यल(झीगु स्वनिगः)

यलया स्थानीयवासीतय्सं लगातार आन्दोलन याःगुलिं अन्ततः अनया घोविघाट लागाय् सरकारं सुकुम्वासीत मतैगु हे जुल । मल पोखरी संरक्षण संघर्ष समितिं लागातार रुपं आन्दोलन याःगुलिं सरकारं म्हिगः मंगलवाः आन्दोलनकारीतय्त वार्ताय् सःतूगु खः । वार्ताय् यलया घोविघाट लागाय् सुकुम्वासीत मतयेगु धकाः सहमति जूगु दुसा आः स्वन्हुया दुने सुकुम्वासीतय्त तयेगु नितिं मेगु विकल्प मालीगु जूगु दु । उकिया नितिं सरकारं काठमाण्डौं उपत्यका विकास प्राधिकरणया आयुक्त केशव स्थापितयात भाला ब्यूगु दु ।
येँया थापाथलीं चीकूपिं सुकुम्वासीतय्त यलया घोविघाट लागाय् तयेत्यंगु विरोधय् स्थानीयवासीतसें वंगु आइतवाःनिसें स्वन्हु तक यल बन्दया घोषणा याःगु खःसा निन्हु तक लगातार बन्द याये धुंकाः मंगलवाः बहनी जुइवं सरकारं वार्ताय् वयेत आह्वान याःगु खःसा अनं लिपा म्हिगः मंगलवाःया यल बन्द ज्याझ्वःयात लितकयाः वार्ताय् वंगु खः ।

२०३२ सालय् तत्कालिन सरकारं स्थानीयवासीया जग्गा साः पुखू दयेकेगु नितिं अधिग्रहण याःगु खःसा उगु हे लागाय् थापाथलीं चीकूपिं सुकुम्वासीयात तयेगु नितिं धकाः धमाधम टहरा दयेकाः लाखौं तका खर्च तकं याये धुंकूगु खः । अथे यलया घोविघाटय् सुकुम्वासी तये हयेगु नितिं ज्या तिब्र रुपं यायेवं स्थानीयवासीं संघर्ष समिति हे दयेकाः सतक आन्दोलन याःगु खः ।

सरकारं बिचाः हे मयासे हथासं यलया घोविघाटय् सुकुम्वासीत तयेगु धकाः ज्या याःगुलिं उकिं यानाः ध्यबा नोक्सान जूगु दुसा मेखे स्थानीयवासीत तकं आन्दोलनय् क्वहां वयेमाःगु अवस्था ब्वलंगु नापं सरकारं थःगु निर्णययात हे लित कायेमाःगु अवस्था ब्वलंगुलिं सरकार दूरदृष्टि मजुयाः अज्वःगु समस्या वःगु खः धकाः मनूतय्सं टिप्पणी यानाहःगु दु ।