कांग्रेस—एमालेपाखें एकीकृत माओवादीलिसे

थौं ‘निर्णायक वार्ता’

येँ (झीगु स्वनिगः)

वर्तमान अवस्थाय् मुलुकयात राजनीतिक निकास बिइगु नितिं धकाः नेपाली कांग्रेस व नेकपा (एमाले)पाखें थौं बुधवाः न्हिनय् ११ बजे एकीकृत नेकपा (माओवादी)लिसे निर्णायक वार्ता याइगु जूगु दु । उगु वार्ताय् एकीकृत माओवादी, नेपाली कांग्रेस व एमालेया शीर्ष नेतातय्सं ब्वति कयादी धाःगु दु । राजनीतिक अन्यौलता ब्वलनाच्वंगु वर्तमान अवस्थाय् निकासया नितिं दक्ले न्हापां प्रधानमन्त्री डा. बाबुराम भट्टराई नं राजीनामा बिइमाः धकाः माग यानाः वयाच्वंगु खःसा आः न्हूगु कथं न्ह्याः वनेत कांग्रेस—एमालें निर्णायक वार्ता यायेगु धकाः तयारी याःगु खः ।

म्हिगः मंगलवाः एमालेया केन्द्रीय ज्याकू बल्खुइ निगू दलया शीर्ष नेतातय्गु दथुइ मुँज्या च्वनाः उगु कथं निर्णय याःगु खः । उगु मुँज्याय् ब्वति कयाः वःम्ह कांग्रेसया नेतृ रामचन्द्र पौडेलं संचारकःमितलिसे खँल्हासेंं थौं बुधवाः निर्णायक वार्ता यायेगु खँ क्वःजित धकाः धयादीगु दु ।
वय्कलं माओवादीलिसे निर्णायक वार्ता जुइ धुंकाः थःपिनिगु रणनीति तयार यायेगु जुइ धकाः नं धयादिल । कांग्रेसं प्रधानमन्त्रीया उम्मेदवार आः तक नं क्वःछिइ मफत धकाः एमालेपाखें दबाव बियाच्वंगुयात कयाः तःगु न्ह्यसःयात कयाः नेता पौडेलं धयादिल ‘सहमति हे मजुइकं गथे यानाः प्रधानमन्त्रीया उम्मेदवार ल्ययेगु ?’
अथे हे कांग्रेया महामन्त्री प्रकाशमान सिंहं संचारकःमितलिसे खँल्हासें धयादिल ‘सहमतिया वातावरण ब्वलंकेगु नितिं कुर्सी त्वःतेमाः । संविधानसभाया कार्यकाल ल्यंदुगु इलय् हे याकःति कथं निर्वाचनया घोषणा याःम्ह सरकारयात कुर्सीइ च्वनेगु नैतिक व संवैधानिक अधिकार मदु ।’

सरकार क्वःथलेगु रणनीति

एमालेया केन्द्रीय ज्याकू बल्खुइ च्वंगु कांग्रेस—एमालेया शीर्ष नेतातय्गु दथुइ वर्तमान सरकारयात क्वःथलेगु नितिं रणनीति दयेकेत वार्ता सुरु याःगु दु । निर्वाचन आयोगपाखें मंसीर ७ गते निर्वाचनया नितिं माःगु कथं कानुन संशोधनया नितिं साउन ७ गते तकया म्याद ब्यूगु खःसा उगु म्याद फुइ धुंकाः आः थःपिं गुगु कथं न्ह्याः वनेगु धैगु विषययात कयाः रणनीति दयेकेत अथे वार्ता याःगु खः ।

सरकारं अध्यादेशया माध्यमं कानुन संशोधन यायेगु तयारी याःगु दु धकाः तायेकाः कांग्रेस व एमालेपाखें थःपिनिगु रणनीति तयार यायेगु नितिं अथे वार्ता सुरु याःगु खः । ता ई न्ह्यःनिसें कांग्रेस व एमालेया दथुइ वार्ता तकं जुयाच्वंगु अवस्था खःसा आः वयाः हाकनं निगू दलया शीर्ष नेतातय्गु दथुइ वार्ता सुरु याःगु खः ।