उपप्रधानमन्त्री प्रकाशपाखें प्रमलिसे मतभेद दुगु खुलासा

येँ (झीगु स्वनिगः)

उपप्रधान नापं परराष्ट्रमन्त्री नारायणकाजी श्रेष्ठ प्रकाशं विप्पासहित प्रधानमन्त्री डा. बाबुराम भट्टराई नं यानादीगु राष्ट्रिय स्वाधिनताय् लिच्वः लाइगु फुक्क कथंया सम्झौता भिंकेमाः धकाः धयादीगु दु । पार्टी व सरकार दुने नं थः व प्रधानमन्त्री भट्टराईया दथुइ गम्भीर मतभेद दु धकाः खुलासा यानादिसें एकीकृत माओवादीया न्वकु श्रेष्ठं विप्पा सम्झौताया विषययात कयाः थःम्हं मन्त्री परिषद्या मुँज्याय व भारतीय प्रधानमन्त्री मनमोहन सिंहलिसेया दुई पक्षीय वार्ताय् तकं असमति प्वंकागु दु धकाः स्पष्ट यानादिल ।

म्हिगः सोमवाः येँय् जूगु साक्षात्कार ज्याझ्वलय् न्वंवासें उपप्रधानमन्त्री प्रकाशं धयादिल ‘विप्पा सम्झौता करेक्सन यायेमाः । प्रधानमन्त्रीं पार्टी दुने व पिने सहमति मयासे याःगु कारणं उगु सम्झौतायात पुनरावलोकन याये हे माः ।’
वय्कलं धयादिल ‘राष्ट्रिय स्वाधिनताया प्रर्वद्धन व रक्षा यायेगु विषययात पार्टी दुने जि व बाबुरामया दथुइ गम्भीर मतभेद दु ।’
एकीकृत माओवादीया न्वकु श्रेष्ठं धयादिल ‘छु छु निर्णय व नीतिं राष्ट्रिय स्वाधिनताय् लिच्वः लाकी उकियात जिं विरोध यानाः दनेगु जुइ ।’
उपप्रधानमन्त्री प्रकाशं पार्टि दुने स्वाधिनतायात स्वयेगु स्पष्ट धारणा मदयाः विप्पा लगायतया राष्ट्रिय स्वाधिनता विरोधी सम्झौता जूगु दावी यानादिसें राष्ट्रिय स्वाधिानताया पक्षय् दनेगु इलय् छुं नं जःलाखःला देय्या विपक्षय् दन धैगु तायेके मज्यू धकाः स्पष्ट यानादिल ।

भारतयात स्वयेगु दृष्टिकोणय् फरक मदु

परराष्ट्रमन्त्रीं पार्टीया न्हय्क्वःगु विस्तारित मुँज्या न्ह्यः व लिपा भारतयात स्वयेगु दृष्टिकोणय् छुं नं कथंया ह्यूपाः वःगु मदु धकाः धयादिल । वय्कलं आः एकीकृत माओवादीपाखें क्रान्तियात क्वचायेकेगु व राष्ट्रिय स्वाधिनताया पक्षय् सु लिसे नं सम्झौता यायेगु जुइमखु धकाः स्पष्ट यानादिल ।

नेपाः सम्वन्धी बिज्ञ छिमेकी भारतया राष्ट्रिपतिइ निर्वाचित जुयादी धुंकाः नेपालं वय्कःयात स्वाभाविक रुपं हे सकारात्मक अपेक्षा याःगु दु धयादिसें आः नेपाः व भारतया दथुइ स्वापू सकारात्मक पक्षय् न्ह्यब्वाकेगु नितिं कुतः यायेगु जुइ धयादिल  ।
विस्तारित मुँज्यां पार्टीइ सैद्धान्तिक व राजनीतिक रुपं वःगु विचलन व पार्टी दुने प्रदूर्षण चीकाः न्हूगु कम्युनिष्ट पाटीया रुपय् विकास यायेत उन्मुख यानाबिल धकाः नं नेता श्रेष्ठं दावी यानादिल ।

चिर्वाचन लिहां वनीगु

वर्तमान सरकारं घोषणा याःगु मंसीर ७ गतेया संविधानसभाया चुनाव आः लिहां वनीगु जुल धकाः उपप्रधानमन्त्री प्रकाशं धयादीगु दु । वय्कलं संविधानसभाया निर्वाचनया नितिं दलतय्गु दथुइ सहमति अनिवार्य खः धयादिसें सहमति मजुइकं चुनाव असम्भव धकाः नं धयादिल ।

कांग्रेस व एमालेया सहमित मजुइकं चुनाव यायेफैगु अवस्था मदु धयादिसें आः तकया अवस्था स्वयेबलय् निर्वाचनया मिति सरेजुइ धकाः न्ह्यथसें वय्कलं धयादिल ‘आःया अवस्थाय् राजनीतिक दलतय्गु दथुइ सहमति मजुइकं निर्वाचनया नितिं संविधान व ऐन कानुन संशोधन याये फैमखु । अले गथे यानाः निर्वाचन जुइ ?’