यल बन्दं जनजीवन प्रभावित थाय् थासय् प्रहरी हस्तक्षेप

यल (झीगु स्वनिगः)

थापाथलीं चीकूपिं सुकुम्वासीतय्त यलया घोविघाट लागाय् तयेत्यंगु विरोधय् स्थानीयवासीतसें यल बन्द आह्वान याःगुलिं अनया जनजीवन म्हिगः आइतवाः प्रभावित जूगु दु । मल पोखरी संरक्षण संघर्ष समितिं आह्वान याःगु यल बन्दया न्हापांगु दिनय् अनया यातायात, कलकारखाना, शिक्षण संस्था तकं ठप्प जूगु दु । स्थानीयवासीं म्हिगः सुथंनिसें अन प्रदर्शन याःगु खः । प्रदर्शनया झ्वलय् यलया पूच्वय् प्रहरीं हस्तक्षप तकं यानाः निगू दर्जनं मल्याक मनूत घाःपाः जूगु दु ।

अथे हे निगू दर्जनं मल्याक प्रदर्शनकारीतय्त प्रहरीं गिरफ्तार तकं याःगु दु । तत्कालिन अवस्थाय् तत्कालिन सरकारं स्थानीयवासीया जग्गा सा पुखू दयेकेगु नितिं धकाः अधिग्रहण याःगु खःसा उगु जग्गाय् हे सुकुम्वासीतय्त तयेगु तयारी यायेवं स्थानीयवासीं विरोध यानाः वयाच्वंगु खः ।

स्थानीयवासीं थौं सोमवाः व मंगलवाः नं यल बन्द यायेगु घोषणा यानातःगु दु । छगू प्रयोजनया नितिं काःगु जग्गा मेगु प्रयोजन याये मदु धकाः स्थानीयवासीं आन्दोलन याःगु खः ।