मुखर्जी भारतया झिंस्वम्हम्ह राष्ट्रपति

भारतया वरिष्ठ राजनीतिज्ञ प्रणव मुखर्जी भारतया न्हूम्ह राष्ट्रपति जूगु दु । भारतय् जूगु राष्ट्रपतिया चुनावय् यूपीएया उम्मेदवार प्रणव मुखर्जी प्रतिद्वन्दी पीए. संगमायात बुकाः राष्ट्रपति जुयादीगु खः ।

वंगु प्यंगू दशक न्ह्यःनिसें राजनीतिइ सक्रिय जुयादीम्ह मुखर्जी भारतया झिंस्वम्हम्ह राष्ट्रपति जुयादीगु दु । तर भारतया न्हापांम्ह राष्ट्रपति डा. राजेन्द्र प्रसाद निक्वः तक राष्ट्रपति जुयादीगुलिं मुखर्जी थुगु पदय् च्वनीम्ह झिंनिम्हम्ह जूगु दु ।

आः वय्कलं २५ जुलाइ बुधवाः कुन्हु राष्ट्रपतिया सपथ कयादी । वर्तमान राष्ट्रपति प्रतिभा पाटीलया कार्यकाल वइगु २४ जुलाइ कुन्हु क्वचायेत्यंगु दु ।

वंगु विहिवाः राष्ट्रपति पदया लागि चुनाव जूगु खःसा ९५ प्रतिशत मतदान जूगु खः । नियम कथं राष्ट्रपति चुनावय् संसदया निगुलिं सदनया दुजःया नापनापं राज्य विधानसभाया दुजःतय्सं नं मतदान याइगु खः ।

मुखर्जीयात निगुलिं सदनया ७७६ सांसदत मध्ये ५२७ मत वःगु खःसा प्रतिद्वन्दी पीए संगामायात २०६ मत लाःगु खः । मुलायम सिंह लिसें १५ म्ह सांसदतय्गु थी थी कारणं खारेज जूगु दु ।

अन्तय् मुखर्जी ५,५७,९६८ मतया लिसें विजयी घोषित याःगु दु ।

More Stories Like this