लेण्डुप दोर्जेया लँपुइ बाबुराम भट्टराई
येँ (झीगु स्वनिगः)
पुलांम्ह प्रधानमन्त्री सूर्यबहादुर, पुलांम्ह जुजु ज्ञानेन्द्र व एमालेया तत्कालिन प्रधानमन्त्री माधवकुमारं तकं आँट याये मयाःगु व याये मफूगु सुपुर्दगी राष्ट्रघाती लगायत सन्धि सम्झौतात यानाः देशय् न्हापांम्ह कम्युनिष्ट दलालया रुपय् प्रधानमन्त्री डा. बाबुराम भट्टराई न्ह्यःने वःगु दु धकाः नेकपा—माओवादीया छ्याञ्जे देव गुरुङं द्वपं बियादीगु दु ।
नेकपा—माओवादीया एकीकृत नेवाः राष्ट्रिय मुक्ति मोर्चा नेपाःया केन्द्रीय समितिया न्हापांगु विस्तारित मुँज्याय् नेता गुरुङं अथे द्वपं बियादीगु खः ।
अन्तर्राष्ट्रिय विमानस्थल भारतीय कम्पनीयात लःल्हागुयात राष्ट्रघातया पराकाष्ट खः धयादिसें वय्कलं धयादिल ‘थःगु पार्टीें स्वंगु व ब्वलंकूगु जनसेनायात नेपाली सेनायात लःल्हानाः इतिहासय् थौं तक्क सुं नं सैनिक तानाशाही नं मयाःगु ज्या प्रचण्ड बाबुरामपिन्सं याःगु दु ।’ राष्ट्रियता व देयया अखण्डता खतराय् लानाच्वंगु इलय् फुक्क कम्युनिष्ट व क्रान्तिकारीत छप्प छधी जुयाः नव संशोधनवाद व आत्मसम्पर्णवादीपिनिगु विरुद्ध मोर्चाबन्दी यानाः सतक संघर्ष न्ह्याके मफुसा नेपाःया स्वतन्त्रता समाप्त जुइ कयादिसें छ्याञ्जे गुरुङ प्रम भट्टराई लेण्डुप दोर्जे जुइगु लँपुइ दुहां वनाच्वंगु खः धयादिल ।
ज्याझ्वलय् वय्कलं सेना परिचालन यायेत नं मखुगु खँ धयाः पार्टी व जनतायात लखय् मिखां खंकेगु ज्या एकीकृत माओवादीया नायः प्रचण्डं याःगु दु धकाः नं धयादिसें नेकपा—माओवादीं ७ गू जनसेनाया शिवरय् च्वंगु ल्वाभः नियन्त्रणय् काइन धकाः म्वाः मदुगु द्वपं बियाः सेना परिचालन याःगु खः धकाः दावी यानादिल ।
अथे हे नेकपा—माओवादीया केन्द्रीय दुजः व आदिवासी जाति, क्षेत्रीय महासंघया कजि सुरेश आलेमगरं आदिवासी जनजाति, नेवाःतय्गु हक अधिकारया नितिं जनचेतना थनाः संघर्षया वातावरण दयेकेमाः धयादीगु दु । एकीकृत नेवाः राष्ट्रिय मुक्ति मोर्चाया नायः व नेकपा—माओवादीया केन्द्रीय दुजः पवनमान श्रेष्ठया नायःसुइ जूगु उगु मुँज्याय् थीथी जिल्ला संगठन व क्षेत्रपाखें रिपोर्टिङ न्ह्यब्वःगु खः ।
नेवाः मोर्चापाखें राजनीतिक प्रतिवेदन नायः श्रेष्ठं हे न्ह्यब्वयादीगु खः । सामान्य छलफल लिपा दुहांवःगु सुझावयात ध्यानय् तयाः उगु प्रस्ताव पारित याःगु खः ।
मोर्चाया मूछ्याञ्जे देवेन्द्र श्रेष्ठं न्ह्याकादीगु उगु ज्याझ्वलय् संगठन विस्तारया नितिं तत्काल यायेमाःगु ज्याझ्वःया बारे नं सहलह जूगु खः ।
