केन्द्रीय कमिटी विघटन

प्रचण्डया सम्पत्ति पार्टीयात लःल्हाइगु

येँ (झीगु स्वनिगः)

एकीकृत नेकपा (माओवादी)या केन्द्रीय समिति विघटन याःगु दु । येँय् न्ह्यानाच्वंगु एकीकृत माओवादीया विस्तारित मुँज्यां अथे पार्टीया केन्द्रीय समितियात विघटन याःगु खः ।

अथे केन्द्रीय कमिटी विघटन यानाः पार्टीया नायः पुष्पकमल दाहाल प्रचण्डया हे नेतृत्वय् महाधिवेशन आयोजक समिति तकं गठन याःगु दु । न्यान्हु तक न्ह्याःगु विस्तारित मुँज्याया अन्तिम दिं म्हिगः शनिवाः अथे केन्द्रीय कमिटी गठन याःगु दु । अथे हे माओवादीया स्थायी समिति व पोलिटब्यूरो तकं विघटन याःगु दु । महाधिवेशन आयोजक समितिइ आदिवासी जनजाति, मधेसी, मुस्मां लगायतया दुथ्याकी धाःगु दु । अथे हे एकीकृत माओवादीया महाधिवेशन वइगु माघ महिनाय् यायेगु धकाः नं निर्णय याःगु दु । माओवादीं सहरी जिल्लाया इन्चार्जयात गामय् अले गामय् च्वंपिं इन्चार्जयात सहरय् छ्वइगु जूगु दु । विस्तारित मुँज्याया समापनया झ्वलय् नायः प्रचण्डं थःगु सम्पत्ति पार्टीयात लःल्हायेगु घोषणा यानादीगु खः । माओवादीइ खास यानाः लडाकुया ध्यबा हिनामिना जूगु विषययात कयाः मुँज्या तकं चर्केजूगु नापं गोलमाल तकं याःगु खःसा अनंलिपा कार्यकर्तात अझ आक्रमक जुइफु धकाः तायेकाः सामसुम यायेगु नितिं प्रचण्डं अथे थःगु सम्पत्ति पार्टीयात लःल्हायेगु ज्या यानादीगु खयेमाः धकाः अनुमान यानाहःगु दु ।

प्रचण्डं अथे थःगु सम्पत्ति पार्टीयात लःल्हायेगु घोषणा यायेवं कार्यकर्तातय्सं लापा थानाः लसकुस याःगु खः ।उगु विस्तारित मुँज्यां पिहां वःपिं एकीकृत माओवादीया प्रतिनिधि कार्यकर्तातय्सं पार्टी एकताया पक्षय् नारावाजी तकं याःगु खः । शुक्रवाः ला माओवादीया उगु विस्तारित मुँज्याय् मेचं कयेकाः तकं ल्वापु जूगु खः । पार्टीया नायः प्रचण्ड पक्षधरं प्रधानमन्त्री डा. बाबुरामयात अले बाबुराम पक्षधर कार्यकर्तातय्सं प्रचण्डयात आक्रमण यायेगु कुतः याःगु खःसा उकिं यानाः मुँज्या तकं गोलमाल जूगु खः । नेतातय्सं पार्टी दुने गुटबन्दी मन्त धकाः न्ह्याक्व हे घोषणा याःसां बास्तवय् गुटबन्दी दनि धकाः क्यंगु दु ।

थ्व हे दथुइ एकीकृत माओवादीया नायः प्रचण्डं लाजिम्पात त्वःतीगु जूगु दु । अथे हे थिकेगु गाडी नं गयेगु त्वःतीगु जूगु दु । प्रचण्डं दरवार थें जुइक लाजिम्पातय् च्वनाच्वन धकाः कार्यकर्तातय्तसं आलोचना यानाः वयाच्वंगु खः ।