हमामपाखें गौरबयात छगू लख डलर बिउगु सार्वजनिक

भ्रष्टाचारया द्वपं लानाच्वंम्ह एसियाली फुटबल परिषदया पुलांम्ह नायः मोहम्मद बिन हमामं अखिल नेपाल फुटबल संघ एन्फाया नायः गणेश थापाया काय् गौरवयात छगू लख डलर बिउगु पुष्टि याःगु दु ।

अमेरिकी समाचार संस्था एपीं सार्वजनिक याःगु एएफसीया लेखा परीक्षणया रिपोर्टय् हमामं गौरबयात बिना शीर्षक बैंकपाखें उगु धेबा बिउगु न्ह्यथनातःगु दु । फिफाया उम्मेदवार जुइगु झ्वलय् हमामयात मत न्याःगु द्वपं लायेवं फिफां वय्कःयात फुटबलया छुं नं गतिविधिइ दुमथ्याइगु कथं आजीवन प्रतिबन्ध तःगु खः ।

कासालिसे सम्बन्धि अदालत कोर्ट अफ आर्विटेरियन फोर स्पोर्टस्ं फिफाया क्वःछिना उल्टयाःगु निन्हु हे मदुनिबलय् एपीं लेखा परीक्षण सम्बन्धि गोप्य विवरण सार्वजनिक याःगु खः ।

पुलांम्ह नायः हमामयात अदालतं सफाइ बिउसां नं एएफसीया भ्रष्टाचारया बारे आन्तरिक छानबीन न्ह्यानाच्वंगु दु । थुगु एएफसीया न्वकू तकं जुयादीम्ह गणेश थापां फिफाया चुनावय् शुरुनिसें हे हमामयात समर्थन यानावयाच्वंगु खः ।

हमामं एएफसीया कम्पिटिशन डिभिजन युवा कार्यक्रमया प्रमुख जुयाच्वंम्ह गौरवयात बिउगु धेबा एसियाय् व्यक्तिया नामय् इउँगु दक्कलय् अप्वः धेबा खः । अथेहे हमामं फिलिपिनो फुटबल अधिकारी जोसे मारी मार्टिनेजयात ख्वीद्वः डलर पूर्वी टिमोरया फुटबल संघया अधिकारी फ्रा_िन्सस्को कलबुआदियात न्यय्द्वः डलर ब्यक्तिगत कथं इना बिउगु खः ।

More Stories Like this