ज्ञानेन्द्रयात कारवाही मयासाः जनस्तरं कारवाही यायेगु ख्याच्वः
येँ (झीगु स्वनिगः)
नेपाःया राजनीतिइ अन्यौलता ब्वलनाच्वंगु आःया अवस्थाय् पुलांम्ह जुजुयात राज्यं कारवाही मयात धाःसा जनस्तरं कारवाही यायेगु जुइ धकाः ख्याच्वः ब्यूगु दु ।
ऐतिहासिक जनआन्दोलया घाइते समाजं राजसंस्था पुनः स्थापना यायेगु अभिब्यक्ति ब्यूम्ह पुलांम्ह जुजु ज्ञानेन्द्र शाहयात तत्काल कानुनया कठघराय् हयाः कडा सजाय बिइत माग याःगु दु । थःपिनिगु माग सुनवाई मजुल धाःसा थःपिं हे कारवाहीया नितिं क्वहां वयेगु जुइ धकाः ख्याच्वः नं समाजं ब्यूगु दु ।
जननिर्वाचित संविधानसभां संविधान मदयेकूसे भंग जूगु व जिम्मेवारी राजनीतिक दल राष्ट्रिय सहमतिइ वने मफयाच्वंगु अवस्थाय् पुलांम्ह जुजु ज्ञानेन्द्र शाह नं छुं दिं न्ह्यः जक अथे अभिब्यक्ति बियादीगु खः । शाहया उगु अभिब्यक्तिं थःपिं फुक्क सहिद परिवार नापं घाःपाः जूपिं अजूचाःगु दु धकाः समाजया न्वकु सुमनबहादुर मगरपाखें जारी याःगु विज्ञप्तिइ न्ह्यथनातःगु दु ।
ज्ञानेन्द्रं तत्काल न्हय्गू दललिसे राजसंस्था तयेगु लिखित सहमति जूगु दावी यानाः सेरेमोनियल जुजुया रुपय् गद्दीइ लिहां वयेगु अभिब्यक्ति बियादीगु खः । समाजं विज्ञप्तिपाखें ख्याच्वः बियाः धयातःगु दु ‘यदि थःपिनिगु मागयात सुनवाई मयात धाःसा सहिदया छेँ परिवार्रं मेपिं सहिद जन्मे याइ । छपा ल्हाः त्वःधूसां मेगु ल्हाः नं त्वाःल्हायेत तयार दु व नागार्जुन दरबारपाखें पहां वल धाःसा थःपिन्सं हे कारवाही यायेत बाध्य जुइ ।’
लिपांगु इलय् ज्ञानेन्द्र शाह थाय् थासय् वनाः मनूतय्त नापलायेगु अले संचारमाध्यमतलिसे तकं खुल्ला रुपं राजतन्त्र लिहां वइ धकाः न्वंवायेगु यानाहःगु दु ।
