भारतया सेनाध्यक्ष छाय् नेपालय् ?

येँ (झीगु स्वनिगः)

भारतया स्थल सेनाध्यक्ष विक्रम सिंह कन्हय् मंगलवानिसें नेपाः भ्रमणया नितिं येँय् वइगु जूगु दु । प्रधान सेनापति छत्रमानसिंह गुरुङया औपचारिक निमन्त्रणाय् वय्कः नेपाःया न्यान्हुया भ्रमणया नितिं वयेत्यंगु खः । सिंह कन्हय् मंगलवाः सनिलय् येँय् थ्यनेवं हे सैनिकमञ्चय् च्वंगु वीर स्मारकय् माल्यार्पण यानाः औपचारिक भ्रमण सुरु यानादी धाःगु दु ।

अनंलिपा वय्कलं नेपाली सेनाया जंगी अड्डा परिसरय् सम्मान याइगु जूगु दु । अथे हे भारतीय स्थल सेनाध्यक्ष सिंह व नेपाली सेनाया प्रधान सेनापति गुरुङया दथुइ सैनिक जनसम्पर्क निर्देशनालय दुने भेटवार्ता जुइ । कन्हय् खुन्हु बुधवाः वय्कः काभ्रे पाँचखालया वीरेन्द्र शान्ति कार्य तालिम केन्द्रया अवलोकनया नितिं उखेपाखे वनादीसा उखुन्हु हे सनिलय् प्रधानमन्त्री नापं रक्षामन्त्री डा. बाबुराम भट्टराईयात नापलानादीगु जूगु दु । उखुन्हु हे बहनी राष्ट्रपति भवनय् जुइगु विशेष समारोहलय् सिंह सहभागी जुयादीसां अन राष्ट्रपति डा. रामवरण यादवं वय्कःयात मानार्थ महारथीया दर्जा प्रदान यानादी ।

अनंलिपा प्रधानसेनापति छत्रमान सिंह गुरुङं भारतीय स्थल सेनाध्यक्ष सिंहया सम्मानय् जंगी अड्डाय् ब्यालि भ्वय् ग्वसाः ग्वयादी । २८ गते सुथय् भारतया स्थल सेनाध्यक्ष सिंह मुस्ताङ, जोमसोमया सैनिक उच्च शिविर शिक्षालयया भ्रमण यानादी । लिहां वयेगु झ्वलय् पोखराया भारतीय पेन्सन इनेगु ज्याझ्वलय् व नेपाली सेनाया पश्चिम पृतना मुख्यालय भ्रमण यानदी । अथे हे २९ गते लुम्बिनी निसें थीथी लागा भ्रमण यानादी धाःगु दु ।

नेपाःया राजनीति अन्यौलताय् लानाच्वंगु अवस्थाय् अथे भारतया स्थल सेनाध्यक्ष नेपालय् वयेत्यंगुयात मनूतय्सं अर्थपूर्ण रुपं कयाहःगु दु । विशेष यानाः भारतीय सरकार नाप स्वापू दुगु छगू कम्पनीयात नेपाःया एयरपोर्ट लःल्हाइगु जुल धकाः राजनीतिक दलतय्सं नापं प्यखेरं तसकं विरोध यानाहःगु, नेपालय् बजेटया सवालयात कयाः सरकार व राष्ट्रपतिया दथुइ कचमच जुइगु संभावना अप्वयाः वनाच्वंगु अले असहज परिस्थिति वल धाःसा नेपाली सेनाया भूमिका छु जुइ धैगु विषययात कयाः चासो तयेगु नितिं हे वय्कः थ्व अवस्थाय् नेपाः भ्रमणय् झायादीगु खयेमाः धकाः मनूतय्सं अनुमान यानाहःगु दु ।