फेडररया न्हूगु कीर्तिमान

विम्बल्डन टेनिसया मिजंतय्गु उपाधि स्वीस कासामि रोजर फेडररं त्याकूगु दु । लण्डनय् आइतवाः जूगु कासाय् बेलायतया नं. १ कासामि एण्डी मुर्रेयात बुकाः न्हय्क्वःखुसी विम्बल्डनया उपाधि त्याकूगु दु ।

कीर्तिमानी च्याक्वःखुसी विम्बल्डन टेनिसया फाइनल कासा म्हितूम्ह फेडररं प्यंगूगु वरियताया मुर्रेयात ४-६, ७-५, ६-३ व ६-४ या सेटं बुकाः समग्र बेलायतयात स्तब्ध याना बिउगु दु ।

स्वंगूगु वरियताया फेडरर थुगु कासाया उपाधि त्याकेवं वरियताक्रमय् शीर्ष स्थानय् थहांवंगु जक मखु अमेरिकी कासामि पीट साम्प्रासया निसः व चय्खुगू वाः तक शीर्ष स्थानय् च्वंगु कीर्तिमानलिसे नं बराबरी याःगु दु । अथेहे १७ गू ग्राण्डस्लाम टेनिस उपाधि त्याकाः न्हूगु कीर्तिमान न तयेत ताःलाःगु दु ।

मेखे बेलायती कासामि मुर्रे धाःसा हाकनं छक्व बनी आष्टिनया लँपुइ वंगु दु । ७४ दँ लिपा विम्बल्डनया फाइनलय् वंम्ह मुर्रे ७६ दँ लिपा उपाधि त्याकूम्ह बेलायती कासामि जुइत ताःलाके मफुत । फेडररलिसेया १६ गू कासाय् च्यागू कासा त्याकेत ताःलाःम्ह मुर्रे महत्वपूर्ण कासाय् धाःसा हाकनं छक्वः लिउने लाःगु दु । सन् २००८ य् यूएस ओपन व सन् २०१० य् अष्ट्रेलियन ओपनया फाइनलय् थें थुगुसि नं विम्बल्डनया फाइनलय् मुर्रे फेडररलिसे बूगु दु । प्यंगू ग्राण्डस्लामया फाइनल मध्ये स्वंगुलिइ फेडररलिसे बूगु दु ।

आइतवाःया फाइनल कासाय् हःपाः बीत कासा ख्यलय् थ्यंकादीम्ह बेलायती प्रधानमन्त्री डेभिड क्यामरुन, वरिष्ठ अधिकारीत लिसें स्वीद्वःम्ह घरेलु दर्शकया अपेक्षायात बेलायती कासामि मुर्रे ल्यंकातये मफुत ।

बेलायती कासामि फ्रेड पेरीं सन् १९३६ य् विम्बल्डनया उपाधि त्याकूगु लिपा आःतक बेलायती कासािमं थुगु उपाधि त्याकेफूगु मदुनि ।

More Stories Like this