भारतय् संचार उद्यमीया हत्या
येँ (झीगु स्वनिगः)
वीरगञ्जया रेडियो बिन्दास एफएमया प्रवन्ध निर्देशक ३२ दँया सन्तोष गुप्तायात भारतय् गोलीं कयेकाः स्याना ब्यूगु दु ।
रक्सौल बैंकरोड (भारत)निवासी गुप्तायात वंगु शुक्रवाः चान्हय् ढाका चिरैया धैगु थासय् म्हमस्यूपिं मनूतय्सं गोलीं कयेकाः स्याना ब्यूगु खः । भारतीय प्रहरीं संचारकःमितय्त बियादीगु जानकारी कथं विहारया पूर्वी चम्पारण जिल्लाया ढाका चिरैयालाय् शनिवाः सुथय् गुप्ता सिनाच्वंगु अवस्थाय् लुयावःगु खः । गुप्ता भारतीय जालीनोटया कारोबारय् दुु व उकिया हे कारणं विवादया दथुइ अथे हत्या प्रकरण जूगु खयेमाः धकाः प्रहरीं आशंका याःगु दु । भारतीय प्रहरीं संचार उद्यमी गुप्तयात अथे हत्या यानाब्यूगु घटनायात कयाः अनुसन्धान यानाच्वंगु दु ।
हत्या काण्ड घटनाय् स्वापू दुगु आशंकाय् प्यम्हेसित प्रहरीं नियन्त्रणय् काःगु दु । उगु घटनायात कयाः संचारकःमितय्सं सरोकार क्यंगु दुसा हत्यारायात ज्वनाः कार्वाही यायेमाः धकाः माग यानाहःगु दु । सन्तोष गुप्ता प्रवन्ध निर्देशक जुयाच्वंगु रेडियो विन्दास ९४ दशमलब ९ मेगाहर्ज थ्यंमथ्यं प्यला न्ह्यः जक संचालनय् वःगु खः ।
