स्वंगूगु राजनीतिक धारया नितिं संघर्ष यानाः वनेगु जुइ : किरण

येँ (झीगु स्वनिगः)

नेकपा—माओवादीया नायः मोहन बैद्य किरणं मुलुकया निकासया नितिं स्वंगूगु राजनीतिक धारया नितिं संघर्ष यानाः वनेगु जुइ धकाः धयादीगु दु ।
आःया अवस्थाय् सरकारवादी दलतय्सं ब्यागलं कथंया मोर्चा दयेकाच्वंगु अले इमिसं न्ह्याथे यानाः नं वर्तमान कामचलाउ सरकारयात ल्यंकाः तयेगु नितिं केन्द्रीत जुयाच्वंगु नापं विपक्ष दल धाःपिं कांग्रेस व एमालेया गठबन्धनं न्ह्याथे यानाः नं सरकारयात क्वःथयेगु नितिं जक भूमिका म्हिताच्वंगु खँ न्ह्यथसें निकासया नितिं न्ह्याः वनाच्वंगु मदु धकाः नेता किरणं स्पष्ट यानादिल ।

थीथी इलय् च्वयादीगु च्वसुयात मुंकाः च्वमि डा. चन्द्रमान बज्राचार्यं सफूया रुप बियादीगु ‘किन पिरोल्छ भारत नेपाललाई ?’ विमोचन ज्याझ्लय् म्हिगः नेता किरणं अथे धयादीगु खः ।
ज्याझ्वलय् मूपाहांया थासं नेकपा—माओवादीया नायः किरणं मुलुकया राजनीतिक अन्यौलतायात निकास बिइगु नितिं थीथी दलतय्सं तयाच्वंगु अवधारणायात कयाः धयादिल ‘सरकारवादीतय्गु मोर्चाय् संविधानसभाया चुनाव यायेमाः धाइपिं व पुनस्र्थापना यायेमाः धाइपिं नं दुगुलिं छगू कथं गाइजात्रा जुयाच्वंगु दु ।’
वय्कलं संविधानसभाया चुनाव यथास्थितिइ जुइगु अवस्था मदु धयादिसें निर्वाचन आयोगं तकं मंसीर ७ गते चुनाव याये फैमखुत धकाः धाये धुंकूगु अवस्थाय् आः गुगु नं हालतय् यथास्थितइ चुनाव यायेफैगु अवस्था मदु, उकिं चुनाव आःया नितिं निकास मखु धकाः दावी यानादिल ।

अथे हे कांग्रेस व एमालेया गठबन्धनं संविधानसभा पुनस्र्थापना धकाः धयाच्वंगु दुसां संविधानसभा नं पुनस्र्थापना यानाः निकास जुइमखु धकाः न्ह्यथसें नेता किरणं धयादिल ‘प्यदँ तक दलया छुं छुं नेतातय्सं ६०१ सभासद्तय्त पाखा लगेयानाः लोकतन्त्रया नामय् तानाशाही जुयाः पिहां वःगुलिं आः हाकनं पुनस्र्थापना यायेवं निकास बिइफैगु अवस्था मदु । न्हापा थें हे दोहोरे मजुइ धकाः सुनां नं धायेफैगु अवस्था मदु ।’

वय्कलं देय्या स्थिति गम्भीर जूगु खँ न्ह्यथसें आः विघटन जूगु संविधानसभाय् दुथ्याःगु दलतय्सं जक निकास बिइ मफैगु जुयाःथःपिन्सं अथे गोलमेच सभाया लँपु न्ह्यःने तयागु खः धकाः स्पष्ट यानादिल ।
ज्याझ्वलय् मिसा नेतृ शान्ता श्रेष्ठया सभापतित्वय् जूगु उगु सफू उलेज्याय् पाहां कथं सीमाविद् बुद्धि नारायण श्रेष्ठ, नेपाली कांग्रेसया भीमबहादुर तामाङ लगायतयापिं झायादीगु खः । ज्याझ्वलय् सफूया च्वमि डा. बज्राचार्य व शान्ता श्रेष्ठं नं थःथःगु नुगःखँ तयादीगु खः ।