थनिंनिसें मधेश बन्द
स्वनिगः वइगु यातायात पूर्ण रुपं ठप्प
यें (सन्ध्या टाइम्स) / कांग्रेस व एमाले जानाः मधेशी जनअधिकार फोरमयात कुचा याःगु द्वपं बिसें थौं फोरमया संस्थापन पक्षं तराई बन्द याना बिउगु दु ।
बन्दया कारणं पूर्वी तराईया फुक्क धइथें जिल्ला पूर्ण रुपं बन्द जुयाच्वंगु दुसा पश्चिम तराईलय् नं बन्दया लिच्वः लानाच्वंगु खँ धाःगु दु ।
बन्दया कारणं बारा पसा्र रौतहट सप्तरी सर्लाही आदि लागा पूर्ण रुपं ठप्प दु ।
अथे हे तराई बन्दया झ्वलय् फोरमया कार्यकर्तातय्सं तराई लागाय् टायर च्याकाः लँ अवरुद्ध यानाच्वंगुलिं ताःहाकःगु दूरीया यातायात पूर्ण रुपं प्रभावित जुयाच्वंगु दु ।
तराईया बजाः कलकारखाना यातायात शिक्षण संस्था पूर्ण रुपं बन्द जुयाच्वंगु दु । तर कपिलवस्तुइ धाःसा बन्दया लिच्वः मलाःगु खँ धाःगु दु । अन फोरमया जिल्ला नेतां पार्टीया केन्द्रीय समितिइ ब्वलंगु ल्वापु मज्यंकं छुं नं कथंया बन्द हडताल मयायेगु धकाः निर्णय यानाः म्हिगः वक्तव्य पिकायेवं थौं अन बन्दया लिच्वः मलाःगु खः ।
थ्वहे झ्वलय् राष्ट्रपतिया पलाः भिंकेमाःगु व संसदय् संकल्प प्रस्ताव दर्ता याकेमाःगु माग यासें माओवादी समर्थित तमुवान राष्ट्रिय मुक्ति मोर्चां थौं तमु प्रदेश बन्द याःगु दु ।
बन्दया झ्वलय् तमुवानया कार्यकर्तातय्सं लमजुङ्गय् नेपाल विद्युत प्राधिकरणया बा। ४ च ३१८ नम्बरया गाडी तोडफोड याना बिउगु दु । अथे हे पोखराय् नं तमुवान कार्यकर्तातय्सं कथि सहित दुवाः दुवातय् च्वनाः बन्द यानाच्वंगु दु ।
बन्दं यानाः तमुवान लागाय् लाःगु गोरखा कास्की तनहुँ लमजुङ्ग पर्वत स्याङ्गजा मनाङ्ग व मुस्ताङ्ग जिल्ला पूर्ण रुपं प्रभावित जुयाच्वंगु दु । तमुवान लागाय् नं यातायात कलकारखाना स्कूल आदि पूर्ण रुपं बन्द दु ।
उखे म्हिगः माओवादीं याःगु ताम्सालिङ्ग बन्दय् भ्वँतया स्थानीय जनतां याःगु प्रतिकारया विरुद्ध थौं माओवादीं भ्वँत बजारय् प्रदर्शन यानाच्वंगु दु ।
