सिक्किमय् लाखामरि तालिम
नेवाः तजिलजिलिसे तप्यंक हे स्वापू दुगु थीथी परिकार मध्ये लाखामरि नं छताः खः । थुगु लाखामरी गजाःगु जुइ व गुकथं दयेकेगु अले थ्व लाखामरिया महत्व नेवाः तजिलजि गुकथं दु शाय्द झीसं थुकियात उलि दुग्यंक वाः चायेका च्वनागु मदु जुइ । तर जःलाखःला देय् भारतया सिक्किमय् धाःसा थ्व लाखामरिया महत्वयात हे थुइका अन च्वंपिं थःपिंसं हे दयेकेगु कुतः यात । थुकियात ग्वाहालि यानादिल भाजु गणेशराम लाछिं ।
मध्यपुर कला परिषद्या भाजु लाछि वंगु दशकौं न्ह्यःनिसें सिक्किमय् नेवाः तजिलजि व भाषा प्रशिक्षणया लागि निस्वार्थ भावनां ज्या याना वया च्वनादीम्ह खः । वय्कःया हे नेतृत्वय् वंगु असार १ गते सिक्किमय् लाखामरि तालिमया लागि अन झायादीगु खः । असार ७ व ८ गते दक्षिण सिक्किमया सम्बुकय् असार ११ व १२ गते सिक्किमया राजधानी ग्यान्तोकय् व असार १३ व १४ गते मल्ली डाँडाय् लाखामरि दयेकयेगु व महत्वया बारे तालिम ब्यूगु खः । थुगु तालिमया लागि लाखाछेँया प्रोपाइटर भाजु लक्ष्मण गमाल अन झायादीगु खः ।
नेवाःया न्ह्याग्गु कर्मकाण्ड यायेमाःसां मदयेक मगाःगु थ्व लाखामरि न्ह्याब्लें हे येँय् नं यंके माःगु व येँय् नं यंकेबलय् तज्याइगुलिसें थीथी समस्या दुग व सिक्किमय् हे थ्व दयेके फुसा अःपुइगुलिं थथे तालिमया ग्वसा ग्वयागु तालिम ग्वसाखलकं जानकारी ब्यूगु खः । तालिमय् ब्वतिकयादीपिंसं थुकियात थःगु व्यवसायिक रुपं हे न्ह्याके फइगु नं जानकारी बियादिल ।
थ्वया हे दथुइ पश्चिम सिक्किम देन्तामय् नेवाः बाजंया प्रशिक्षण नं जुयाच्वंगु दु । मध्यपुर कला परिषद्या बाजं प्रशिक्षकपिं भाजु कुलरत्न मानन्धर व बालमुकुन्द प्रजापतिं बाजं प्रशिक्षण बिया च्वनादीगु दु । अथेहे भाषा प्रशिक्षणया लागि भाजु अनिल स्थापित झायादीगु खःसा छवाःया प्रशिक्षणलिपा येँये लिथ्यने धुंकूगु दु ।
More Stories Like this
काेरियाय् नेवाः भ्वय्, नम्रता श्रेष्ठयात हन न्यूयाेर्कय् इहि राजनीतिक दलतय् घोषणापत्र व नेवाः दृष्टिकोण किपुली मंकाः बाखं गोष्ठि "वर्तमान राजनीतिक संन्दर्भय् नेवाः स्वायत्त राज्य" सम्बन्धि गोष्ठी
