उपाधिया लागि मुर्रे व फेडरर दथुइ कासा जुइगु

७४ दँ लिपा बेलायती कासामि विम्बल्डनया फाइनलय् थ्यंगु


बेलायती नं एक कासामि एण्डी मुर्रे विम्बलल्डन टेनिसया फाइनलय् थ्यंगु दु । शुक्रवाः चान्हय् जूगु कासाय् न्यागूगु वरियताया जो विलफ्रेड सोंगायात बुकाः उपाधिया लिक्क थ्यंगु खः । उगु कासाय् फ्रेन्च कासामि सोंगायात ६-३, ६-४, ३-६ व ७-५ या सेटं बुकाः न्हय्प्यदँ लिपा विम्बल्डन टेनिसया मिजंतय्गु फाइनलय् थ्यंगु खः ।

आः उपाधिया लागि खुक्वःतकया च्याम्पियन रोजर फेडरर लिसे म्हिती । स्वंगूगु वरियताया कासामि फेडररं शीर्ष वरियताया नोभाक जोकोभिकयात बुकाः न्हय्क्वःखुसी उपाधि त्याकेगु लँपुइ वनाच्वंगु दु । च्याक्वःखुसी विम्बल्डनया फाइनल कासा म्हितेगु लागि स्वीस कासामि फेडररं जोकोभिकयात ६-३, ३-६, ६-४ व ६-३ या सेटं बुकूगु खः । थुगु उपाधि त्याकल धाःसा फेडरर न्हय्क्वः तक उपाधि त्याकूम्ह अमेरीकी कासामि पीट साम्प्रासया कीर्तिमानलिसे बराबरी याइगु जक मखु जोकोभिकयात लिउने लाकाः हाकनं शीर्ष स्थानय् च्वंवइ ।

थ्वहे झ्वलय् शनिवाः मिसातय्गु उपाधिया लागि प्यक्वःतकया च्याम्पियन सेरेना विलिम्स व पोल्याण्डया राडवान्स्कालिसे धेंधेंबल्ला याइगु जूगु दु ।

More Stories Like this