उपाधिया लागि विलियम्स व राडवान्स्का म्हितीगु

अमेरिकी टेनिस कासामि सेरेना विलियम्स विम्बल्डन टेनिसया फाइनलय् दुहांवंगु दु । विहिवाः जूगु कासाय् निगूगु वरियताया भिक्टोरिया अजोरेन्कायात ६-३ व ७-६ या सेटं बुकाः न्हय्क्वःखुसी विम्बल्डनया फाइनलय् दुहांवंगु खः ।

प्यक्वःतकया च्याम्पियन विलियम्स अजारेन्काया बुकेगु झ्वलय् २४ गू एस थ्वाःगु खः । न्यावाः न्ह्यः टेनिस क्यारियरया हे दक्कलय् बांमलाक्क फ्रेन्च ओपनया न्हापांगु चरणं हे पिहांवम्हं विलियम्सं कासाय् अजारेन्कायात तसकं दबावय् तःगु खः। विलियम्सं न्हापांगु सेटय् ९४ प्रतिशत विजयी सर्भ याःगु खःसा निगूगु सेटय् ७६ प्रतिशत विजयी सर्भ थ्वाःगु खः । आः विलियम्सं उपाधिया लागि वइगु शनिवाः पोल्याण्डया एग्निस्का राडवान्स्का लिसे म्हितीगु जूगु दु ।

उखे स्वंगूगु वरियताया राडवान्स्कां एन्जिलिक कर्बरयात ६-३ व ६-४ या सेटं बुकाः फाइनलय् दुहांवंगु खः । राडवान्स्का सन् १९३९ लिपा न्हापांखुसी ग्राण्डस्लामया फाइनलय् थ्यंम्ह न्हापाम्ह कासामि जूगु दु ।

More Stories Like this