कन्हय् यल बन्दया घोषणा
येँ (झीगु स्वनिगः)
वर्तमान सरकारं यँेया थापाथलिइ लागां छुं दिं न्ह्यः जक चीकूपिं सुकुम्वासीतय्त यलया धोविघाटया कमलपोखरी अफल त्वालय् तयेत्यंगु यात स्थानीयवासीं विरोध याःगु दु । सूर्यमान महर्जनया नेतृत्वय् १७ म्ह दुजःत तयाः दयेकूगु मल पोखरी संरक्षण संघर्ष समितिपाखें उकियात विरोध याःगु खः ।
न्हापा २०३२ सालय् स्थानीयवासीया ५ सय ६८ रोपनी जग्गा उगु मल पोखरी दयेकेत धकाः सरकारं अधिग्रहण यानातःगु खःसा आः उगु मल कारखाना संचालन मजुयाच्वंगु नापं उगु जग्गा एसियाली विकास बैंकय् धितो तयातःगु दु । अथे सुकुम्वासी तयेगु खःसा उगु जग्गा स्थानीयवासीयात हे लितबिइमाः धकाः संघर्ष समितिं माग याःगु दु ।
थ्व हे झ्वलय् म्हिगः बुधवाः संघर्ष समितिं यलया धोविघाटया राममन्दीर लागाय् पत्रकार सम्मेलन यानाः जुलुस यानाः नखुइ पिकाःगु खःसा अथे हे थौं विहिवाः सुथय् ९ बजेनिसें १० बजे तक चक्रपथय् चक्का जाम, २२ गते कन्हय् यल बन्द यायेगु धकाः तकं घोषणा याःगु दु ।
उगु संघर्षयात नेकपा—माओवादी, नेपाली कांग्रेस, एमाले, राप्रपा, नेकपा (माले) व नेकपा (एकीकृत)या जिल्ला नेतृत्वत वयाः समर्थन नापं सहभागीता प्वंकूगु दु ।
