विमानस्थल भारतयात बिइगु बारे अख्तियारपाखें स्पष्टिकरणया माग

येँ (झीगु स्वनिगः)

नेपाःया छगू जक अले सुरक्षा नापं हरेक दृष्टिकोणं महत्वपूर्णगु अन्तराष्ट्रिय विमानस्थलयात तकं वर्तमान कामचलाउ सरकारं भारतया छगू कम्पनीयात लःल्हाये त्यंगुलिं नेपाःया राजनीतिइ तसकं चासोया विषय जुयाब्यूगु दु । थ्व हे झ्वलय् त्रिभुवन अन्तराष्ट्रिय विमानस्थल व्यवस्थापन भारतीय कम्पनीयात बिइत डा. बाबुराम भट्टराईया नेतृत्वय् दुगु वर्तमान कामचलाउ सरकारं तयारी याःगु बारे अख्तियार दुरुपयोग अनुसन्धान आयोगं स्पष्टिकरणया माग याःगु दु । वर्तमान सरकारं भारतयात अन्तर्राष्ट्रिय विमानस्थलया व्यवस्थापन लःल्हायेत्यंगु समाचार संचार माध्यमपाखें प्रचार जुइवं अख्तियारं नागरिक उड्डयन प्राधिकरणया महानिर्देशक त्रिरत्न मानन्धरयात स्वन्हुया दुने स्पष्टिकरण बिइत पौ ब्यूगु दु ।

अख्तियारया प्रवक्ता ईश्वरी पौडेलं धयादी कथं विमास्थलया स्तरोन्नति, सुधार व व्यवस्थापनया जिम्मा भारतया कम्पनियात बिइगु बारे आः तक जूगु ज्यायात कयाः अथे स्पष्टिकरण माग याःगु खः ।
सरकारं त्रिभुवन अन्तर्राष्ट्रिय विमानस्थलया स्तरोन्नति, सुधार व व्यवस्थापनया जिम्मा विदेशी कम्पनी आईएल एन्ड एफएस कम्पनीयात लःल्हाये त्यंगु समाचार संचारमाध्यमपाखें सार्वजनिक जूगु खः । नागरिक उयड्डयन प्राधिकारणं उसियाली विकास बैंक (एडीबी)या ऋण व थःगु हे स्रोतपाखें स्तरोन्नतिया ज्या यायेगु तयारी यानाच्वंगु अवस्थाय् सरकारं न्हू गठन याःगु लगानी बोर्डपाखें अथे भारतीय कम्पनीयात जिम्मा बिइगु नितिं प्रक्रिया न्ह्याकूगु खः ।

एकीकृत नेकपा (माओवादी)या न्वकु बाबुरामया नेतृत्वय् दुगु वर्तमान कामचलाउ सरकार भारतीय पक्षया खः धकाः मनूतय्सं धयाः वयाच्वंगु अवस्थाय् आः वयाः अन्तर्राष्ट्रिय विमानस्थल तकं भारतया छगू कम्पनीयात लःल्हायेगु नितिं प्रक्रिया न्ह्याकूगुलिं सरकार भारत पक्षधर धकाः पुष्टि यायेगु ज्या यात धकाः विश्लेषण यानाहःगु दु । थ्व हे दथुइ नेकपा—माओवादीं छगू विज्ञप्ति पिथनाः त्रिभुवन अन्तराष्ट्रिय विमानस्थल भारतीय निजी कम्पनीयात लःल्हायेगु सरकारं लगानी बोर्डपाखें सम्झौता यायेगु तयारी याःगु प्रति थःपिनिगु गम्भीर ध्यानाकर्षण जूगु खँ न्ह्यथंगु दु ।

पार्टीया नायः मोहन बैद्य किरण व मूछ्याञ्जे रामबहादुर थापा बादलं ल्हाःचिं तयाः जारी यानादीगु उगु विज्ञप्तिइ अन्तर्राष्ट्रिय विमानस्थल थें जाःगु तसकं संवेदनशील थाय्या निर्माण व व्यवस्थापनया भाला विदेशी कम्पनीयात बिइगु कुतः धैगु राष्ट्रिय सार्वभौमसत्ताया सुरक्षाया दृष्टिकोणं तसकं गम्भीर नापं आपत्तिजनक विषय खः धकाः न्ह्यथसें उगु राष्ट्रिय हित प्रतिकूलया अजःगु कथंया सम्झौता मयायेत माग यासें उगु कथंया राष्ट्रघाटी सम्झौता याके मबिइत वामपन्थी, देशभक्त व लोकतन्त्रवादी शक्तितय्त इनाप तकं याःगु दु ।