शिवराम व तारादेवी २०६८या वर्ष कासामि

गल्फ कासामि शिवराम श्रेष्ठ व भारोतोलनया तारादेवी पुन वर्षया उत्कृष्ट कासामि जूगु दु । नेपाल खेलकूद पत्रकार मंचया ग्वसालय् जूगु पल्सर स्पोर्टस अवार्डय् शिवराम मिजंपाखें व तारादेवी मिसापाखें २०६८ सालया उत्कृष्ट कासामि घोषित जूगु खः ।

गल्फया शिवरामं पौडीया शैलेश राणा, कि्रकेटया पारस खडका, एथलेटिक्सया तिलकराम थारु व घोडचडीया ध्रुवप्रसाद अर्यालयात लिउने लाकाः उगु उपाधि त्याकूगु खः । २०६८ सालय् दक्कलय् अप्वः धेबाः कमेयाःम्ह नेपाःया कासामि शिवरामं सन् २०११-१२ या सिजनय् ११ गू मध्ये ७ गू उपाधि त्याकूगु खः ।

अथेहे मिसापाखे उत्कृष्ट कासामि घोषित जूम्ह तारादेवी पुनं एथलेटिक्सया प्रमिला रिजाल, पौडीया श्रेया धिताल, टेबलटेनिसया नबिता श्रेष्ठ व ब्याडमिन्टनया नङ्गसलदेवी तामाङयात लिउने लाकूगु खः । खुक्वःगु राष्ट्रिय खेलकूद कासा अन्तरगत भारोत्तोलनया ६९ गू केजीइ क्लिन एण्ड जर्कय् ९१ गू व मुक्कं १५७ केजी ल्ह्वनाः न्हूगु राष्ट्रिय कीर्तिमान तःगु खः ।

थ्वहे झ्वलय् १९ दँ क्वय्या राष्ट्रिय कि्रकेट पुचःया कप्तान पृथु बास्कोटा उत्कृष्ट युवा कासामि घोषित जूगु दुसा थुगुसिया कि्रकेटया प्रशिक्षक जगट टमाटा उत्कृष्ट प्रशिक्षक जूगु दु ।

अथेहे भलिबल कासामि रमिला तण्डुकार थुगुसिया लोकपि्रय कासामि जुइत ताःलाःगु दु । रमिलां मुक्कं ४४ द्वः निसः व पीन्याकू भोट काःगु खः । ज्याझ्वलय् नेपाःया न्हापांम्ह ओलम्पियन भूपेन्द्र सिलवालयात लाइफ टाइम अचिभमेण्ट अवार्ड बिउगु दुसा पाराएथलेट वर्ष कासामि शर्मिला लामिछानेयात व स्पेशल एवार्ड अफ दि एअरया उपाधि रतन टण्डनयात बिउगु दु ।

वर्षया उत्कृष्ट कासामि व पपुलर प्लेयर अफ दि इयर जुइत ताःलाःिपं कासामितय्सं बजाज पल्सर मोटरसाइकल त्याकूगु दुसा मेमेगु विधाया विजेतातय्सं स्वीद्वः/स्वीद्वः तका त्याकूगु दु ।

More Stories Like this