‘प्रचण्ड, कोइराला, खनाल, भट्टराई व नेम्वाङं संविधानसभा भंग याःगु खः’
येँ (झीगु स्वनिगः)
नेपाल आदिवासी जनजाति महासंघया नायः राजकुमार लेखीं खुम्ह नेतातय्सं हे संविधानसभा भंग याःगु खः धकाः धयादीगु दु ।
म्हिगः मंगलवाः नेपाल पत्रकार महासंघ यलया ग्वसालय् ‘मिडियाय् समावेशीया सवाल’ विषययात कयाः जूगु अन्तरक्र्रियात्मक ज्याझ्वलय् न्वंवायेगु झ्वलय् नायः लेखीं अथे धयादीगु खः । वय्कलं नेपाःया मिडिया समावेशी मजूगु जक मखु निष्पक्ष तकं मजू धयादिसें आःया अवस्थाय् मिडिया हाउस व मिडियां विइगु विषय तकं समावेशी जुइमाः धकाः धयादिल ।
ज्याझ्वलय् नेवाः पत्रकार राष्ट्रिय दबूया नायः श्रीकृष्ण महर्जनं आःया अवस्थाय् राज्यया प्यंगू निकाय व्यवस्थापिका, कार्यपालिका, न्यायपालिका व संचार जगत मध्ये न्यायपालिका व मिडिया अग्रगामी ह्यूपाःया पक्षय् मदयाः हे समस्या जुयाच्वंगु नापं आः नेपाल पत्रकार महासंघया नं पुनर्संरचना यायेमाः धकाः बः बियादिल । उगु ज्याझ्वलय् नेपाल पत्रकार महासंघया केन्द्रीय दुजःपिं दिपक केसी, प्रकाशचन्द्र परियार अथे हे मधेसी मडिया समाजया नायः मोहनसिंह, नेपाल आदिवासी जनजाति पत्रकार संघया मूछ्याञ्जे डण्ड गुरुङ लगायतयापिन्सं मिडियां विइगु समाचार समावेशी, निष्पक्ष जुइमाः धकाः बः बियादिल ।
नेपाल पत्रकार महासंघ यल जिल्लाया सभापति पूर्ण सिंहया नायःसुइ जूगु अथे पुलांम्ह सभासद् नापं पत्रकार महासंघया पुलांम्ह केन्द्रीय दुजः विनोद पहाडी, नेपाल पत्रकार महासंघ यल जिल्ला सल्लाहकार प्रभुनारायण बस्नेत, जेपि गुप्ता, केशव देवकोटा लगायतयापिन्सं नं मिडियाय् समावेशीताया विषययात कयाः थःथःगु नुगःखँ प्वंकादीगु खः ।
उगु अन्तक्र्रिया ज्याझ्वलय् अप्वः यानाः पत्रकारतय्सं आःया अवस्थाय् यदि मिडियायात समावेशीकरण याये मफत धाःसा कन्हय् वनाः ज्यामछिंगु अवस्थाय् तकं नेपाःया मिडियात लायेफु धकाः न्ह्यथसें थौंया ईयात ल्वयेक बुखँ तयार यायेगु इलय् पत्रकारतय्सं ध्यान बिइमाः धकाः बः बियादीगु खः ।
