राष्ट्रपतिं अध्यादेश अस्वीकृत यायेमाः विपक्ष

राष्ट्रपतिं पन धाःसा माघ १९ गते दोहोरेजुइ: सरकार
येँ (झीगु स्वनिगः)

नेपाःया राजनीतिइ आः वयाः बजेटयात कयाः राजनीतिक दलया नेतात केन्द्रीत जूगु दु । विपक्ष दलतय्सं वर्तमान सरकारयाके बजेट हयेगु अधिकार मदु धकाः निष्कर्ष पिकाःगु दु । म्हिगः मंगलवाः एमालेया केन्द्रीय ज्याकू बल्खुइ च्वंगु विपक्षी दलया नेतातय्सं मुँज्यां कामचलाउ सरकारया हैसियतं छुं नं कथंया बजेट हयेगु अधिकार सरकारयाके मदु धकाः ठहर यानाः तत्काल हे प्रधानमन्त्रीं पद त्वःताः न्हूगु सरकार गठनया नितिं लँपु चायेकेत सुझाव तकं ब्यूगु दु ।

मुँज्यां न्हूगु अध्यादेश जारी मयायेत राष्ट्रपति डा. रामवरण यादवयात इनाप यायेगु धकाः तकं निर्णय याःगु दु । मुँज्या लिपा नेपाली कांग्रेसया नेता डा. रामशरण महतं संचारकःमितलिसे खँल्हासें धयादिल ‘सरकारं अध्यादेशपाखें पूण बजेट हयेगु धयाच्वंगु दु । अध्यादेश जारी मयायेत राष्ट्रपतियात नापलानाः इनाप यायेगु जुइ । वर्तमान सरकायात छुं नं कथंया बजेट हयेगु अधिकार मदु ।’

वर्तमान सरकारया विकल्पय् न्हूगु सरकार व न्हूगु सरकार मार्फत पूर्ण बजेट हयेमाःगु विषययात कयाः थःपिन्सं राष्ट्रपतियात इनाप यायेगु जुइ धकाः नं नेता महत्तं धयादिल । वय्कलं धयादिल ‘दक्ले न्हापां वर्तमान सरकारं सत्ता त्वःतेमाल । जिमिसं उकिया बारे राष्ट्रपतियात नापलानाः वय्कःया ध्यानाकर्षण यायेगु जुइ । जिमिगु जोड धैगु बजेट न्ह्यः सरकार हिलेगु हे खः । छुं जुयाः असार तक नं थ्व हे सरकार जुयाच्वन धाःसा आशिक जक बजेट हयेजिउ तर उकिया नितिं नं राजनीतिक सहमति यायेमाः ।’

वय्कलं धयादी कथं विपक्षी दलतय्सं थौं बुधवाः हे राष्ट्रपतियात नापलानाः अथे इनाप यायेगु ज्या याइ । थ्व हे दथुइ अर्थमन्त्री वर्षमान पुनं संसद् मदुगु अवस्थाय् अन्तरिम संविधानया धारा ९६ (क) कथं वंगु दँय् विनियोजीत याःगु कूल बजेटया एक तृतियांश हयेगु संवैधानिक जुइ धयादिसें थःपिन्सं अथे यायेगु जुइमखु धकाः धयादीगु दु । म्हिगः मंगलवाः साक्षात्कार ज्याझ्वलय् न्वंवासें वय्कलं बजेट अनुमोदन यायेगु संवैधानिक निकाय संसद् मदुगु अवस्थाय् पेस्की बजेट हये मजिउ धयादिसें उगु प्रक्रिया हे असंवैधानिक जूगुलिं थःपिं उगु प्रक्रियां वनेगु जुइमखु धकाः नं स्पष्ट यानादिल ।

तृतीयाश बजेटं गुगु नं हालतय् निर्वाचन क्वचायेके फैमखु धयादिसें मन्त्री पुनं धयादिल ‘चुनावया नितिं सुरक्षा माः, निर्वाचन खर्च नं माः, गुगु तृतियांश बाय् मेगु बजेट संभव मदु । उकिं सरकारं पूरा हे बजेट हयेगु नितिं क्रियाशील जुयाच्वनागु दु ।’ आःया अवस्थाय् दलतय्गु दथुइ सहमति मजुल धाःसा अध्यादेशया माध्यमं बजेट हयेगु जुइ धयादिसें उकियात राष्ट्रपतिं स्वीकृत याइ धकाः नं मन्त्री पुनं दावी यानादिल ।

यदि छुं जुयाः राष्ट्रपतिं अध्यादेशयात पन धाःसा उकिं बांलाःगु लिच्वः लाइमखु धयादिसें कांग्रेस, एमाले लगायतया दलतय्सं राष्ट्रपतियात अध्यादेश पंकेगु गुगु कथं कुतः यानाच्वन व तसकं बांमलाःगु खँ खः धकाः न्ह्यथसें वय्कलं धयादिल ‘अध्यादेशयात राष्ट्रपतिं पन धाःसा मेगु माघ १९ गतेया अवस्था वइ ।’