नेकपा—माओवादी व कांग्रेसया दथुइ वार्ता
येँ (झीगु स्वनिगः)
नेकपा—माओवादी व नेपाली कांग्रेसया नेतातय्गु दथुइ म्हिगः सोमवाः वार्ता जूगु दु । निगू दलया शीर्ष नेतातय्गु दथुइ जूगु वार्ताय् आः मुलुकयात निकास बिइगु नितिं मंकाः कथं कुतः यायेमाःगु बारे सहलह जूगु खः । अथे हे राष्ट्रिय सहमतिया सरकार दयेकेगु नितिं नं नापं न्ह्याः वनेमाःगु अले संविधान निर्माणया नितिं विवादित विषययात कयाः गोलमेच सभा यानाः वनेगु ला कि संविधानसभा पुनस्र्थापना यानाः वनेगु लगायतया विकल्पया बारे नं सहलह जूगु खः ।
अथे हे वर्तमान कामचलाउ सरकारं बजेत हये मजिउगु नापं राष्ट्रिय सरकार दयेकाः वनेमाःगु खँय् निगुलिं दलया नेतातय्सं बः ब्यूगु दु । उगु हे कथं आःया अवस्थाय् मंसीर ७ गते चुनाव जुइ मफैगु ठहर यानाः राष्ट्रिय सरकार दयेकेगु खँय् निगुलिं दलया नेतातय् दथुइ सहमति जूगु दु । उगु भेटवार्ता कांग्रेसया सभापति सुशील कोइरालाया निवास महाराजगञ्जय् जूगु खः । उगु भेटवार्ताय् नेकपा—माओवादीपाखें नायः मोहन बैद्य किरण, न्वकु सीपी गजुरेल, मूछ्याञ्जे रामबहादुर थापा बादल, छ्याञ्जे देव गुरुङ अथे हे इलय् कांग्रेसपाखें सभापति कोइराला, महामन्त्रीपिं कृष्णप्रसाद सिटौला व प्रकाशमान सिंह सहभागी जुयादीगु खः ।
