पेरिसडाँडा कब्जा यायेगु ख्याच्वः

‘भट्टराईयात सतकं चीकेत मोर्चाबन्दी यायेगु’

येँ (झीगु स्वनिगः)

न्हू गठन याःगु नेकपा—माओवादीया न्वकु सीपी गजुरेलं केन्द्रीय ज्याकू पेरिसडाँडा नापं देय्न्यंकंया जिल्ला ज्याकु थःपिनिगु नं स्वामित्व दुगुलिं अथें हे त्वःतेगु जुइमखु धकाः धयादीगु दु । म्हिगः सोमवाः येँय् जूगु छगू साक्षात्कार ज्याझ्वलय् नेकपा—माओवादीया नेता गजुरेलं धयादिल ‘पेरिस डाँडाया सम्पत्ति इनेमाः । सहमतिइ मवल धाःसा कब्जा यायेगु जुइ ।’

चितवन पार्टी कार्यालयया सवालयात कयाः जूगु घटनाय् एकीकृत माओवादीया नायः पुष्पकमल दाहाल प्रचण्डया किजा नारायण दाहाल व एकीकृत माओवादी मेम्ह चित्रबहादुर श्रेष्ठया प्रत्यक्ष निर्देशनय् गोली चलेयाःगु खः धकाः द्वपं बियादिल ।
प्रचण्डया नेतृत्वय् दुगु पार्टी विचारया संघर्षय् कमजोर सावित जुइवं भौतिक आक्रमणय् क्वहां वःगु खः धयादिसें नेता गजुरेलं धयादिल ‘जिमिके ल्वाभः मदु, सशक्त विचार दु ।

लडाकुया सुप्रिम कमाण्डर, डेपुटी कमाण्डरया नापं कमाण्डरत जक मजूसे सेना, प्रहरी प्रशासन फुक्कं प्रचण्डयाके हे दु धाःसा जिमिके गथे जुयाः दइ ?’ फुक्क ल्वाभः प्रचण्डयाके हे दु धकाः द्वपं बियादिसें ल्वाभः दुपिन्सं हे चितवनय् गोली काण्ड याःगु उकिइ प्रचण्डया ल्हाः दु धकाः नं दावी यानादिल ।

नेकपा—माओवादीया विदेश नीति भारत व चीननाप समानताया आधारय् न्ह्याः वनेगु स्पष्ट दु धयादिसें नेता गजुरेलं प्रधामन्त्री डा. बाबुराम भट्टरईयात सतकं हे बर्खास्त यायेगु नितिं मंकाः मोर्चाबन्दी यानाः आन्दोलनय् वनेगु बाहेक मेगु विकल्प मदु धकाः स्पष्ट यानादिल ।
वय्कलं सरकारयात क्वःथलेगु नितिं कांग्रेस, एमाले नापं मेमेगु दलतलिसे जानाः मंकाः कथं आन्दोलन यायेगु जुइ धकाः नं खुलासा यानादिल ।
नेकपा—माओवादीया न्वकु सीपी गजुरेलं धयादिल ‘बाबुरामं अथें हे राजीनामा बिइमखु । घेराबन्दीइ लाकाः जनतापाखें हे बर्खास्त यायेत सशक्त कथंया आन्दोलनया आवश्यकता दु ।’
वय्कलं प्रधानमन्त्रीयात पदं चीकेगु नितिं बालुवाटारदुने निरन्तर रुपं घेराबन्दी यायेमाः धकाः बः बियादिल ।
अथे हे थः सत्ताय् च्वनाः च्वनेगु नितिं प्रधानमन्त्रीं संविधानसभा विघटन याःगु द्वपं बियादिसें वय्कलं धयादिल ‘संविधानसभा विघटन यानाः थःगु सत्ता ताः हाकः याइम्ह प्रधानमन्त्रीयात सतकं हे बर्खास्त यायेत फुक्क राजनीतिक दल, नागरिक समाज नापं आम जनतात सतकय् क्वहां वयेगुया विकल्प मदु ।’

नेता गजुरेलं प्रधानमन्त्री भट्टराई विदेशीपाखें संचालित जूगु द्वपं बियादिसें धयादिल ‘भट्टराई गनं संचालित जुयाच्वंगु दु, सुनां गुगु कथं षडयन्त्रपाखें भट्टराइयात कुर्सी तयातल सकलसिनं स्यूगु हे खँ खः ।’ अथे हे सर्वोच्च अदालतया आइतवाःया फैसला कथं पूर्ण बजेट हयेगु लँपु चाल धकाः तायेकल धाःसा व भ्रम जक जुइ धकाः टिप्पणी यानादिसें अदालतं राजनीतिक विषययात कयाः न्वंवायेगु ज्या मज्यू धकाः नं नेता गजुरेलं धयादिल । अथे जर्बजस्ती कथं पूर्ण बजेट हयेत्यन धाःसा उकिं तसकं घातक परिणाम वइ धकाः नं वय्कलं ख्याच्वः बियादिल । दलतलिसे सहमति व सहकार्यविना पूर्ण बजेट हये मजिउगु व हल धाः सतकं हे प्रतिवाद यायेगु जुइ धकाः नं ख्याच्वः बियादिल ।