राजकिशोर यादवयात फोरम गणतान्त्रिकपाखें चीकल
येँ (झीगु स्वनिगः)
राजकिशोर यादवयात मधेसी जनअधिकार फोरम गणतान्त्रिकया कार्यबहाक नायः पदं चीकागु जुल धकाः म्हिगः आइतवाः निर्वाचन आयोगय् जानकारी ब्यूगु दु ।
बहुमत केन्द्रीय दुजलं हस्ताक्षर नापं सूचना तथा संचारमन्त्री राजकिशोर यादवयात पार्टीया कार्यबाहक नायः पदं चीकागु खः धकाः आयोगयात मधेसी जनअधिकार फोरम गणतान्त्रिकं जानकारी ब्यूगु खः ।
उगु पार्टीया मूछ्याञ्जे आत्माराम शाहपाखें पार्टीं बाबुराम भट्टराई सरकारयात यानाः वयाच्वनागु समर्थन लित कायेफै धकाः धयादीगु दु । वय्कलं धयादिल ‘यादवयात सूचना तथा संचारमन्त्रीपाखें थौं हे बर्खास्त यायेत प्रधानमन्त्रीयात जानकारी बिइगु जुइ । प्रधानमन्त्रीं वय्कःयात बर्खास्त मयात धाःसा सरकारयात याना वयाच्वनागु समर्थन लित कायेगु जुइ ।’
आः मधेसी जनअधिकार फोरम गणतान्त्रिकया सह—अध्यक्ष नन्द कुमार दत्तयात कार्यबाहक नायः दयेकेग घोषणा तकं बहुमत दुजःतय्सं याःगु दु । निर्वतमान नायः जयप्रकाश गुप्ता भ्रष्टाचार अभियोगय् जेलय् लाये धुनेवं हे उगु पार्टीया कार्यबाहक नायः यादव यात दयेकूगु खः ।
