अन्यौलताय् लात नेवाः आन्दोलन

येँ (झीगु स्वनिगः)

नेवाः स्वायत्त राज्यया नितिं नेवाःतय्सं मंकाः कथं मोर्चा दयेकाः यानाच्वंगु आन्दोलन आः वयाः अन्यौलताय् लाःगु दु । नेवाःतय्सं तसकं आशा याःगु नेवाः स्वायत्त राज्य मंकाः संघर्ष समिति गनं अथें हे दिनाः वनीगु जकं मखुला धकाः नेवाः आन्दोलनकारीतय्सं न्ह्यसः थनाहःगु दु ।

गथे राजनीतिइ अन्यौलताय् ब्वलनाच्वंगु खः अथे हे नेवाः आन्दोलन नं अन्यौलताय् लाःगु दु । नेवाः स्वायत्त राज्यया नितिं नेवाःतय्गु मंकाःगु मोर्चा दयेकाः आन्दोलन यानाः वयाच्वंगु नेवाः स्वायत्त राज्य मंकाः संघर्ष समितिइ थीथी राजनीतिक दलया जातीय संगठनत दुथ्यानाच्वंगु अले थःथःगु दलपाखें आःया अवस्थाय् राजनीतिक निकासया नितिं ब्यागलं ब्यागलं कथं हयाच्वंगुलिं आःया अवस्थाय् उकिया लिच्वः नं नेवाः आन्दोलनय् लाःगु खने दु । विशेष यानाः एकीकृत नेकपा (माओवादी)पाखें संविधानसभाया चुनावया माध्यमं निकास बिइमाः धकाः तर्क तयाः वयाच्वंगु, नेपाली कांग्रेस व एमालें न्हापां प्रधानमन्त्रीं राजीनामा बिइमाःगु अले जक निकासया नितिं न्ह्याः वनेफैगु नापं एमालें ला संविधानसभा पुनस्र्थापना यानाः आयोगया माध्यमं संविधान हयेमाः धकाः धयाच्वंगु अवस्था दु । अथे हे नेकपा—माओवादींं थ्व इलय् गोलमेच सम्मेलनया माध्यमं निकास बिइमाः धयाच्वंगु दुसा नेपाः राष्ट्रिय पार्टी नं सरकारय् दुगुलिं चुनावया खँयात त्वःते फैगु अवस्था मदु ।

नेवाः स्वायत्त राज्य मंकाः संघर्ष समितिइ एकीकृत माओवादीया एकीकृत नेवाः राष्ट्रिय मुक्ति मोर्चा, नेकपा—माओवादीया नेवाः राष्ट्रिय मुक्ति मोर्चा, एमालेया नेपाल लोकतान्त्रिक नेवाः संघ, कांग्रेस नाप लिक्क लाःगु लोकतान्त्रिक नेवाः दबू अथे हे नेपाः राष्ट्रिय पार्टीया नेवाः ल्याय्म्ह न्ह्यलुवाः नापं नेवाः देय् दबू, नेवाः देय् गुथि नेपाल मण्डल, ज्यापु महागुथि, ज्यापु समाज यल, बौद्ध विहार संघ यल लगायत झिंनिगू संगठन दुथ्यानाच्वंगु दु ।
अथे दलतय्सं थःथःगु कथंया लाइनया खँ तयाच्वंगुलिं उकिं प्रभावित जुयाः नेवाः स्वायत्त राज्य पलिस्थाया नितिं छगू हे मत जूसां आः गथे यानाः वनेगु धैगु विषययात कयाः धाःसा छगू हे मत जुइ मफयाः अन्यौलताय् लानाच्वंगु खः । न्हापा संविधानसभा दुगु इलय् संविधानसभाया माध्यमं न्हूगु संविधानय् थःपिनिगु हक अधिकार सुनिश्चित यायेत नेवाः स्वायत्त राज्यया नितिं संघर्ष यायेगु धैगु खँय् छगू हे मत जुयाः न्ह्याः वंगु खःसा आः वयाः संविधानसभा मदये धुंकूगु अवस्थाय् गुगु कथं न्ह्याः वनेगु धैगु विषययात कयाः धाःसा मंकाः संघर्ष समितिइ दुथ्यानाच्वंगु थीथी घटकतय्गु दथुइ हे ब्यागलं ब्यागलं मत वयाच्वंगुलिं ठोस निर्णय याये मफयाच्वंगु खः । थ्व हे झ्वलय् वंगु असार ८ गतेनिसें ९ गते तक नेवाःतय्गु न्हूगु लँपु मालेत धकाः गोप्य कथं कार्यशाला गोष्ठि याःगु अले अनं लिपा छवाःया दुने थःथःगु घटकया दुने सहलह ब्याकाः मंकाः लँपु मालेगु धकाः सहमति जूगु जूसां असार १७ गते आइतवाः तक नं अथे सहमति याये फयाच्वंगु मदुनि ।

गोप्य कथंया कार्यशाला गोष्ठी जूगु छवाः फुइ धुंकाः नं नेवाःतय्सं आशा यानाच्वंगु थें मंकाः संघर्ष समितिं ज्याझ्वः तकं हये फयाच्वंगु मदुनि । उकिं नेवाः स्वायत्त राज्यया नितिं मंकाः संघर्ष समितिपाखें न्हूगु लँपु दयेके मफयाः अन्यौलता ब्वलनाच्वंगु खः ।