स्पेन व इटाली यूरोकपया उपाधिया लागि धेंधेंबल्ला याइगु

यूरोकप फुटबल कासाया उपाधिया लागि आइतवाः चान्हय् साविक बिजेता स्पेन व इटाली दथुइ धेंधेंबल्ला जुइत्यंगु दु । आइतवाः चान्हय् नेपाःया ई कथं चान्हसिया १२:३० ताः इलय् युक्रेनया राजधानी किभय् थुगु निगू देय् दथुइ धेंधेंबल्ला जुइ ।

कासाया सेमिफाइनलय् पेनाल्टीपाखें पोर्चुगलयात बुकूसें स्पेन यूरोकपया फाइनलय् थ्यंगु खःसा जर्मनीयात छगूया विरुद्ध निगू गोलं बुकाः इटाली उपाधिया लिक्क थ्यंगु खः ।

सन् २०१० या विश्वकप विजेता स्पेन थ्व स्वयां न्ह्यः जूगु संस्करणया यूरोकपया उपाधि त्याकूगु देय् खः । सन् २००८ य् जूगु उगु कासाय् स्पेनं जर्मनीयात बुकाः उपाधि त्याकूगु खः । अथेहे स्पेनं सन् १९६४ नं यूरोकप त्याकेधुंकूगु दु ।

अथेहे समूह चरणया न्हापांगु कासाय् स्पेन लिसे बराबरी म्हितूगु प्यक्वः तकया विश्वकप विजेता इटालीं धाःसा छक्वः जक सन् १९६८ इ उपाधि त्याकूगु दु । इटालीं थौंया कासाय् विश्व विजेता स्पेनयात बुकाः निक्वःखुसी उपाधि त्याकेगु लँपुइ वनाच्वंगु दु ।

स्पेन धाःसा लगातार स्वंगू तःधंगु कासाया उपाधि त्याकाः रेकर्ड तयेगु योजनाय् दु । तर थौंया कासाय् इटालीया कासामि मारियो बालोटेलि धाःसा स्पेनया लागि तःधंगु हाथ्याः जुइफु । बालाटेिलं हे सेमीफाइनलय् जर्मनीलिसे जूगु कासाय् इटालीया लागि निगुिलं गोल याःगु खः ।

More Stories Like this