बाराय् प्यंगू राउण्ड हवाइ फायर
येँ (झीगु स्वनिगः)
बाराया लिप्निमलया नारायणी राइस मिलपाखें्र पिहांवःगु फोहर व प्रदूषण पनेमाःगु माग यानाः मिल परिसरय् थ्यंपिं स्थानीयवासीयात म्हिगः शनिवाः प्रहरीं हस्तक्षेप याःगु दु ।
मिलपाखें पिहां वइगु फोहरं यानाः उगु लागाय् न्हिया न्हिथं प्रदूषित जुयाः वनाच्वंगु खँ न्ह्यथसें स्थानीयवासी फोहर व्यवस्थापनया माग यानाः मिलय् स्थानीयवासी वंगु खः । फोहरं यानाःजःखः लागाया वातावरण स्यंगु नापं स्थानीयवासीया स्वास्थ्यय् तकं लिच्वः लाःगुलिं धकाः अथे स्थानीयवासीं विरोध याःगु खः ।
प्रहरी्रं स्थानीयवासीयात हस्तक्षेप यानाः अश्रुग्यास तकं प्रहार याःगु खःसा अथे हे प्यंगू राउण्ड तकं हवाइ फायर याःगु खः । प्रहरी हस्तक्षेपलिपा उगु लागाय् छगू कथं तनाव ब्वलंगु खः । उगु हस्तक्षेपय् लानाः झिंन्याम्ह स्थानीयवासी घाःपाः जूगु दु । अथे हे छम्ह प्रहरीया तुति त्वःधूगु दु । अथे हे स्थानीयवासीया निगू दर्जन साइकल, निगः मोटरसाइकल तकं प्रहरीं नियन्त्रणय् काःगु दु ।
