चिनियाँ नेतात सक्रिय
येँ (झीगु स्वनिगः)
नेपाःया राजनीतिइ न्ह्याबलें नं भारत हावी जुयाच्वंगु दु धकाः राजनीतिकर्मीतय्सं तायेकाच्वंगु आःया अवस्थाय् चिनियाँ नेतातय्सं नं तसकं चासो तयाहःगु दु । थ्व हे झ्वलय् नेपाः भ्रमणय् वयाच्वंपिं चीनया उच्चस्तरीय पुचलं म्हिगः शनिवाः थीथी दलया शीर्ष नेतातय्त नापलानाः नेपाःया लिपांगु राजनीतिक अवस्थायात कयाः जानकारी कायेगु ज्या यानादीगु दु । उगु पुचलं एकीकृत नेकपा (माओवादी)या नायः पुष्पकमल दाहाल प्रचण्ड, नेपाली कांग्रेसया सभापति सुशील कोइराला, एमालेया नेता झलनाथ खलायात ब्यागलं ब्यागलं कथं नापलानाः सहलह ब्याकादीगु दु ।
चिनियाँ उपमन्त्री नापं चिनियाँ कम्युनिष्ट पार्टीया नेता आइ पिङं चीनपाखें नेपाःया शान्ति स्थायीत्व व विकासया चाहाना यानाच्वंगु दु धकाः धयादीगु दु । वय्कलं नेपाःया दलतय्सं राष्ट्रिय सहमति निर्माण याइ धकाः विश्वासन नं प्वंकादीगु खः । उगु इलय् चीनया नेतातय्सं एकीकृत नेकपा (माओवादी)या मूमू नेतातय्सं व्यागलं कथं न्हूगु नेकपा—माओवादी गठन याःगु विषययात कयाः नं तसकं चासो तयादीगु खः धकाः सूत्रं धाःगु दु ।
भारतं नेपाःया राजनीतिइ विशेष चासो तयाच्वंगु अले अप्रत्यक्ष रुपं हस्तक्षेप तकं यानाच्वंगु दु धकाः नेपाःया राजीतिज्ञतय्सं तायेकाच्वंगु इलय् चीनया प्रतिनिधि मण्डलं नेपाःया राजनीतिक नेतातय्त नापलानाः नेपाःया अवस्थाया बारे चासो तयादीगुयात मनूतय्सं अर्थपूर्ण रुपं कयाहःगु दु ।
