प्रधानमन्त्रीं सःतूगु विशेष समितिया मुँज्या कांग्रेसपाखें बहिस्कार

येँ (झीगु स्वनिगः)

वर्तमान प्रधानमन्त्री डा. बाबुराम भट्टराईपाखें सःतीगु छुं नं कथंया मुँज्यायात नेपाली कांग्रेस व एमालेया नेतातय्सं बहिस्कार याइगु जूगु दु । म्हिगः येँय् जूगु छगू ज्याझ्वःया दथुइ कांग्रेस व एमालेया नेतातय्सं अथे प्रधानमन्त्रीं सःतादीगु मुँज्या बहिस्कार यायेगु जुइ धकाः धयादीगु दु । कांग्रेसया नेता मिनेन्द्र रिजालं मुलुकयात विमतिया लँपुइ यंकीम्ह प्रधानमन्त्रीं पद मत्वःतूतले तक मुलुकय निकास वइमखु धकाः धयादिल ।

वय्कलं धयादिल ‘बाबुरामपथ धैगु जिमिगु लँपुइ वा सहमति जुइ । कांग्रेस बाबुरामपथय् गुगु नं हालतय् वनेगुजुइमखु । कामचलाउ प्रधानमन्त्रीं सःतूगु सेना समायोजन विशेष समितिया मुँज्याय् कांग्रेस एमाले वनेगु जुइमखु । बाबुराम सत्ता ताःहाकः यायेगु नाटक क्यनाच्वंगु दु ।’वय्कलं धयादिल ‘प्रचण्ड व बाबुरामं सत्ता कब्जाया नितिं नियोजित कथं संविधानसभा भंग याःगु खः । न्हूगु चुनाव सत्ताय् च्वनाः च्वनेगु दाउ खः । थथे हे यानाच्वन धाःसा जिमिसं इमित पुलांम्ह जुजु ज्ञानेन्द्रया हालतय् थ्यंकाबिइ ।’

अथे हे एमालेया नेता भीम रावलं यथास्थितिइ कामचलाउ प्रधानमन्त्रीं सःतूगु विशेष समितिया मुँज्याय् एमाले वनेगु जुइमखु धकाः धयादीगु दु । वय्कलं धयादिल ‘मुलकुय् जनप्रतिनिधिविहिन स्थिति याःम्ह प्रधानमन्त्री भट्टराई हे खः । वय्कलं संविधानय् प्रधानमन्त्री चीकेगु व्यवस्था मदु । प्रधानमन्त्री च्वनाः च्वनेगु नं व्यवस्था मदु ।’ नेता रावलं धयादिल ‘जि हे फु्रक्क खः धैगु हठ त्वःताः प्रधानमन्त्रीं राजीनामा बिइमाः मखुसा जनतां सतकं हे चीकाबिइ ।’ संवैधानिक रुपं राष्ट्रपतिं हे प्रधानमन्त्रीयात चीकाः न्हूगु सरकार दयेकेगु प्रक्रिया न्ह्याकेमाःगु ई वल धकाः नं वय्कलं धयादिल ।

उगु ज्याझ्वलय् एकीकृत माओवादीया प्रवक्ता नापं शिक्षामन्त्री दीनानाथ शर्मां प्रधानमन्त्री भट्टराईया धापू हे पार्टीया वटमलाइन खः धकाः स्पष्ट यानादीगु दु । वय्कलं धयादिल ‘प्रधानमन्त्री भट्टराईया भनाइपाखें पार्टीया सुं नं असन्तुष्ट जूगु मदु । नायः प्रचण्ड असन्तुष्ट जूगु धैगु हल्ला जक खः । थ्व हे पार्टीया बटमलाइन खः ।’ नेपाली कांग्रेस व एमाले जातीय पहिचानया संघीयता सहितया संविधानय् समर्थन यात धाःसा प्रधानमन्त्रीया विकल्प हयेवं प्रधानमन्त्रीं राजीनामा बिइ धकाः नं नेता शर्मां धयादिल । वय्कलं धयादिल ‘मुलुकयात अस्तव्यस्त यानाः संवैधानिक संकट ब्वलंकीगु कथं प्रधानमन्त्री भट्टराई नं राजीनामा बिइगु जुइमखु । विकल्प तयार मयासे सतकय् नारावाजी यायेवं राजीनामा वइमखु ।’ राष्ट्रपतिं प्रमयात चीके फैमखु धयादिसें नेता नापं मन्त्री शर्मां धयादिल ‘राष्ट्रपतिं सहमतिया सराकरया नितिं आह्वान जक यायेफै । संविधानया छुं नं धाराय् प्रधानमन्त्रीयात चीकेगु अधिकार मदु । राष्ट्रपतिपाखें कू याइगु अपेक्षा यानागु मदु । अथे जुल धाःसा मुलुकय् दुर्घटना जुइ ।’