क्रान्तिकारी कथं न्ह्याः वनेमाःगु खँय् बः
येँ (झीगु स्वनिगः)
सोमवाःनिसें न्ह्याःगु नेकपा—माओवादीया केन्द्रीय समितिया न्हापांगु मुँज्या म्हिगः मंगलवाः नं न्ह्याःगु दुसा थौं बुधवाः नं जुइ धाःगु दु । मुँज्याय् पार्टीया नायः मोहन बैद्य किरणं न्ह्यब्वयादीगु राजनीतिक प्रतिवेदन अथे हे मूछ्याञ्जे रामबहादुर थापा वादलं न्ह्यब्वयादीगु संगठन व संघर्षया प्रतिवेदनयात कयाः केन्द्रीय नेतातय्सं म्हिगः मंगलवाः थःथःगु बिचाः तयेगु ज्या याःगु दु ।
मुक्कं यानाः ४५ म्ह केन्द्रीय दुजः दुगु जूसां पोलिट््ब्यूरो दुजःत बाहेक यायेबलय् मुक्कं यानाः ३२ म्ह केन्द्रीय दुजःतय्सं थःथःगु बिचाः प्वंकेगु ज्या याइ । म्हिगः छन्हुं हे २० म्ह केन्द्रीय दुजःतय्सं थःथःगु बिचाः तयादीगु खःसा अबले अप्वः यानाः नेतातय्सं आः पार्टीयात क्रान्तिकारी कथं न्ह्याकेमाः धकाः बः बियादीगु खः ।
अथे हे ल्यंदुपिन्सं थौं बुधवाः थःथःगु बिचाः प्वंकादीगु अले थौं हे मुँज्या क्वचायेकीगु संभावना नं दु धकाः छम्ह केन्द्रीय दुजलं जानकारी बियादीगु दु ।
