जनआन्दोलन विरोधी ओलीयात प्रमया उम्मेदवार दयेकीगु
येँ (झीगु स्वनिगः)
२०६२÷०६३ सालया जनआन्दोलनया विरोधी नापं संविधानसभाया चुनावय् जनतां बांमलाक्क पराजीत यानाब्यूम्ह एमालेया नेता केपी शर्मा ओलीयात प्रधानमन्त्रीया उम्मेदवार दयेकेगु तयारी जुयाच्वंगु खँ एमालेया छम्ह नेतां खुलासा यानादीगु दु ।
संघीयताया विरोधी कथं न्ह्यःने वयाच्वंम्ह नापं ब्रम्हुवादी नेता कथं म्हस्यूम्ह ओली न्हापा न्हापा नं प्रधानमन्त्री जुइगु कुतः यानादीगु खः तर संविधानसभाया दुजः मजूगुलिं वय्कःयात ज्यामछिना च्वंगु अवस्था खः । आः संविधानसभा विघटन जुइ धुंकाः बुँलुहुँ नं हाकनं प्रधानमन्त्री जुइगु सोच तयाः न्ह्याः वनादीगु खः धकाः सूत्रं धाःगु दु ।
थ्व हे झ्वलय् नेकपा (एमाले)या पोलिटब्यूरो दुजः रघुजी पन्तं म्हिगः मंगलवाः येँय् जूगु छगू जाझ्वलय् न्वंवायेगु झ्वलय् उगु खँ खुलासा यानादीगु खः ।
वय्कलं यदि कांग्रेसं प्रधानमन्त्रीया उम्मेदवार घोषणा याये मफत धाःसा एमालें ओलीयात उम्मेदवारया रुपय् औपचारिक रुपं थनेगु ज्या जुइ धकाः स्पष्ट यानादीगु दु । प्रधानमन्त्री भट्टराईयात राष्ट्रपति डा. रामबरण यादवपाखें यक्व हे ई बिइ धुंकल धकाः न्ह्यथसें आः निन्हु÷स्वन्हुया ई बियाः राष्ट्रपतिं न्हूगु सरकार गठनया नितिं आह्वान यायेमाः धकाः धयादिल ।
राष्ट्रपतिं अन्तरिम संविधानया धारा ३८ (१) कथं सरकार गठनया नितिं दलतय्त आह्वान यायेमाः धयादिसें नेता पन्तं सहमतिया सरकारगठन जुइ मफत धाःसा दलतय्गु समर्थनय् बहुमतया सरकार गठन यायेगु पाखे वनेमाः धकाः धयादिल ।
संविधानसभा नापं व्यवस्थापिका संसद भंग जुइ धुकूगु अवस्थाय् बहुमतया आधारय् सरकार गठन यायेमाः धाःगु धैगु गनं न्ह्यागु हे दल जूसां नं गुलि यक्व दलतय्गु समर्थनया आधारय् सरकार गठन यायेमाः धकाः जकं नेता पन्तं धयादीगु मखुला धकाः मनूतय्सं न्ह्यसः थनेगु यानाहःगु दु ।
