जिं राजीनामा बिल धाःसा माघ १९ थें जुइ : प्रधानमन्त्री
येँ (झीगु स्वनिगः)
प्रधानमन्त्री डा. बाबुराम भट्टराई नं प्रधानमन्त्रीया जिम्मेवारी धैगु मस्त म्हितेगु खेल थें मखु धयादिसें सुना नं धाल धायेवं पद त्वःतेगु अले सुनाः नं धाल धायेवं च्वनाः च्वनेगु जुइमखु धयादीगु दु । ब्राजिलया रियो सम्मेलनय् ब्वति कयाः म्हिगः सोमवाः येँय् लिहां वयेगु झ्वलय् विमानस्थलय् पत्रकारतलिसे खँल्हासें वय्कलं अथे धयादीगु खः ।
प्रधानमन्त्री बाबुरामं धयादिल ‘मेगु संविधानसभाया चिर्वाचनया परिणाम मवःतले थ्व हे सरकार कायम जुइ । आः थःम्हं राजीनामा बिल धाःसा मुलुकय् तःधंगु संवैधानिक संकट वइगु व अनं लिपाया परिस्थिति माघ १९ थें जुइफु । जिगु नेतृत्वया वर्तमान सरकारया विकल्प मदु ।’
सर्वोच्च अदालतया फैसलाया कारणं स्वतः विघटन जूगु संविधानसभा शान्ति व संविधानया प्रकृया गुगु थासय् वनाः दिनाच्वंगु खः, सहमतिया आधार व हे थासं यायेमाः धयादिल । संचारकःमितय्सं राजीनामा बिइगु गबले धकाः न्यंगु न्ह्यसःया लिसः बिइगु झ्वलय् वय्कलं धयादिल ‘फुक्क खँ थुयाः नं मथूथें यानाच्वंगुया छुं अर्थ मदु ।’
भारतया प्रधानमन्त्री मनमोहन सिंहनिसें राष्ट्रसंघया महासचिव वान कि मुनलिसे नं वर्तमान सकारं याःगु शान्ति—संविधानया नितिं जूगु ज्या यात कयाः सकारात्मक रुपं कयादीगु खँ न्ह्यथसें सहमति जुल धाःसा राष्ट्रिय सरकार दयेकेगु धकाः थःम्हं धयागु तर राजीनामा बिइगु धकाः गबलें नं मधया धकाः नं धयादिल ।
