मुँज्या थौं नं न्ह्याइगु

नेकपा—माओवादी दुने संघर्षया खँय् ब्यापक सहलह

यल (झीगु स्वनिगः)

न्हू गठन याःगु नेकपा—माओवादीया केन्द्रीय समितिया न्हापांगु मुँज्या म्हिगः सोमवाःनिसें न्ह्याःगु दु । मुँज्याय् पार्टीया नायः मोहन बैद्य किरण व मूछ्याञ्जे रामबहादुर थापा वादलं थःथःगु प्रतिवेदन न्ह्यब्वयादीगु खः ।

यलया कुपण्डोलय् च्वंगु ज्याकुथिइ जूगु मुँज्याय् म्हीग आइतवाःजक जूगु पोलिटब्यूरो मुँज्यां तयार याःगु एजेण्डायात दुथ्याकाः नायः किरण व मूछ्याञ्जे वादलं थःथःगु प्रतिवेदन न्ह्यब्वयादीगु खः । मुँज्याय् नायः मोहन बैद्य किरणं वैचारिक राजनीतिक प्रतिवेदन अथे हे मूछ्याञ्जे रामबहादुर थापा वादलं संगठन व संघर्षया योजनायात दुथ्याका प्रतिवेदन पेश यानादीगु खः धकाः केन्द्रीय दुजः यशोदा सुवेदीं संचारकःमितय्त जानकारी बियादीगु दु ।

धाः कथं जनताया हक अधिकारया नितिं आःया अवस्थाय् नेकपा—माओवादीं गुगु कथं संघर्ष यायेगु धैगु विषययात कयाः ब्यापक रुपं सहलह याःगु दु । प्रतिवेदनयात कयाः थनिनिसें केन्द्रीय कमिटीया मुँज्याय् केन्द्रीय दुजःतय्सं थःथःगु बिचाः तयादी धाःगु दु । मुँज्याय् न्ह्यब्वःगु प्रतिवेदन न्ह्यब्वये धुंकाः नायः किरण व मूछ्याञ्जे बादलं प्रशिक्षण तकं बियादीगु खः ।

मुँज्याय् देय्या राजनीतिक परिस्थितियात कयाः व्यापक रुपं सहलह ब्याकाः मुलुकयात निकास बिइगु नितिं म्हितेमाःगु भूमिकाया बारे नं ठोस निर्णय याइ धाःगु दु । सूत्रं धाः कथं के्रन्द्रीय दुजःत थप मयाइगु अवस्थाय् पदाधिकारी व स्यायी समिति छगू हे दयेकाः यंकेगु अले केन्द्रीय दुजःत विस्तार जुइगु अवस्था वलधाःसा व हे कथं पोलिटब्यूरो व स्थायी समिति गठन याइगु संभावना दु  ।