इलाम जिल्ला स्तरीय सहलह मुँज्या क्वचाल

इलाम जिल्लाय् दूगु नेवाःतय्गु जातिय खलः पुचतय्त सुदृढीकरण व क्रियाशील यायेगु विषयस सहलह मुँज्या यायेगु ज्या क्वचाःगु दु । इलाम जिल्लाय् मुक्कं ४८ गाविसय् १५गू जातिय संगठन दूगु व उगु फुक्कं जातिय पुचयात गु कथं सुदृढीकरण व क्रियाशील यायेगु धाइगु विषयस सहलह ज्याझ्वः न्ह्याःगु खः ।

नेवाः देय् दबू इलाम जिल्ला समितिया नायः भाजु युद्ध प्रसाद बैद्य नायसुइ न्ह्यागु उगु ज्याझ्वलय् नेवाः देय् दबूया नायः नापं मूपाहाँ नेरश ताम्राकारं देय् दबू नेपाःया गुगु नं थासय् नेवाः भाषा, कला संस्कृतिया संरक्षण व सम्बर्द्धन यायेगु निंतिं खलः पुचःपिं नाप सहकार्य यायेत तयार दुगु खँ कनादिल ।

नापं वय्कलं आदिवासी जनजातिया आन्दोलनय् इलाम जिल्ला पाखें च्वछाय्बहःगु भुमिका म्हितुगु व इलाम जिल्ला न्ह्याकाः वयाच्वंगु थीथी ज्याझ्वः अतिकं च्वछाय्बहःजूगु खँ कनादिल। भाषिक, संस्कृतिक व जातिय उत्पीडनयात अन्त्य यायेगु निंतिं झी आदिवासी जनजाति नेवाःत मेमेपिं आदिवासी जनजाति नाप सहकार्य याना वनेमाःगु खँय् नं वय्कलं बः बियादिल ।

उगु ज्याझ्वलय् नेवाः देय् दबू इलाम जिल्ला कार्य समितिया दुजः गञ्जु प्रधानं लसकुस न्वचु बिइदुगु खः । अथेहे जिल्ला समितिया छ्याँञ्ये कमला श्रेष्ठं जिल्लां याःगु थीथी ज्याझ्वः नापं जिल्लाय् दुगु थीथी गां समितिया कार्य प्रतिवेदन न्हयब्वयादीगु खः ।

ज्याझ्वलय् नेवाः देय् दबूया न्वकू धर्मशोभा तुलाधर, केन्द्रीय दुजः पूर्णकृष्ण श्रेष्ठ, नेपाल आदिवासी जनजाति महासंघ इलामया नायः किरण मुखिया व जिल्लाया थीथी गां कार्य समितिया प्रतिनिधिपिंनिगु नं ब्वति दूगु खः ।

More Stories Like this