‘थःगु खःसा प्रमाण ज्वनाः काःवा’

यल (झीगु स्वनिगः)

विश्वय् हे दक्ले ताःहाकःगु कथं नालातःगु स्वनिगःया आदिवासी जनजातिय्गु जीवन्त संस्कृति बुंगद्यःया जात्राया झ्वलय् म्हिगः आइतवाः भोटो क्यनेगु जात्रा क्वचाल ।
परम्परांनिसें उगु जात्राया झ्वलय् ज्याउलाख्यलय् भोटो क्यनेगु यानाः वयाच्वंगु खः । किंबदन्ती कथं भोटो सुयागु खः वं थःगु प्रमाण ज्वनाः काःवा धकाः आह्वान यायेगु कथं अथे भोटो जात्रा यानाः वयाच्वंगु खः ।
भोटो क्यनीगु जात्राया दिनय् सरकारपाखें स्वनिगलय् सार्वजनिक विदा बिइगु यानाः वयाच्वंगु दुसा जात्राय् राष्ट्रप्रमुखंनिसें मन्त्रीत तकं उपस्थिति जुइगु यानाः वयाच्वंगु दु ।