माओवादीया प्रस्तावयात कयाः राष्ट्रपति यादव सकारात्मक

येँ (झीगु स्वनिगः)

नेकपा—माओवादीया नेतातय्सं गोलमेच सभाया माध्यमं अन्तरिम सरकार दयेकाः मुलुकयात निकास बिइगु नितिं न्ह्याः वनेमाः धकाः तःगु प्रस्तावयात कयाः राष्ट्रपति डा. रामवरण यादव सकारात्मक जुयादीगु दु । उकिया नितिं माःगु कथंया कुतः यायेत माओवादीया नेतातय्सं इनाप यानादीगु खः । नेकपा—माओवादीं राजनीतिक दल, थःपिपिनिगु हक अधिकारया नितिं आन्दोलन यानाः वयाच्वंपिं आदिवासी जनजाति, मधेसी नापं सरकारं गुलि नं आन्दोलनकारीतलिसे इलय् ब्यलय् वार्ता यानाः सहमति यात उगु कथंया सरोकारवाला व्यक्तित्व नापं नागरिक समाजया प्रतिनिधित तकं दुथ्याकेमाः धकाः माग यानाः वयाच्वंगु खः ।

राष्ट्रपति डा. रामवरण यादवं भेटवार्ता यायेगु नितिं सःताःदीगु इलय् नेकपा—माओवादीया नेतात वनाः खँल्हाःगु इलय् उगु कथं सहलह जूगु खः धकाः सूत्रं धाःगु दु । राष्ट्रपति यादवं न्हापांखुसी नेकपा—माओवादीया नेतातय्त सःताः सहलह ब्याकादीगु खः ।
नेकपा—माओवादीया नेतातय्सं आःया अवस्थाय् दल व सरकारं छुं नं कथंया निकास बिइफैगु अवस्था मदुगुलिं न्हूगु शक्तिया विश्वासय् गोलमेच सभाया माध्यमं निकास बिइमाः धकाः बः बियादीगु खः । राष्ट्रपति निवासय् देय्या राजनीतिक परिस्थितियात कयाः थ्यंमथ्यं स्वघौ तक खँल्हाबँल्हा जूगु खः ।

उगु इलय् वर्तमान सरकार परिवर्तनया बारे नं सहलह जूगु खः । अथे राष्ट्रपतिलिसे भेटवार्ताय् नेकपा—माओवादीया नायः मोहन बैद्य किरण, मूछ्याञ्जे रामबहादुर थापा बादल, छ्याञ्जे सीपी गजुरेल, अथे हे उगु पार्टीया स्यायी समितिया दुजः देव गुरुङ व नेत्र विक्रम चन्द उपस्थित जुयादीगु खः । लिपांगु इलय् राजीतिक अन्यौलतायात कयाः राष्ट्रपति डा. रामवरण यादवं थीथी कथंया राजनीनितक दलया नेतातलिसे सहलह ब्याकेगु ज्या तिब्र रुपं यानाः हयाच्वंगु दु ।

म्हिगः पोलिटब्यूरोया, थौं केन्द्रीय समितिया मुँज्या

नेकपा—माओवादीया म्हिगः आइतवाः हे च्वनेगु धाःगु केन्द्रीय समितिया मुँज्या थौं सोमवाःनिसें जक च्वनीगु जूगु दु । राष्ट्रपतिलिसे भेटवार्ता नेतातय्सं यानादी धुंकाः म्हिगः आइतवाः पोलिटब्यूरोया मुँज्या च्वंगु खःसा थनिनिसें जक केन्द्रीय समितिया मुँज्या च्वनी धकाः उगु पार्टीया छम्ह नेतां झीगु स्वनिगः न्हिपौयात जानकारी बियादीगु दु ।
लिपांगु राजनीतिक घटनाक्रम नापं आः पार्टीं म्हितीगु भूमिकाया बारे सहलह ब्याकेगु नापं पार्टीया एजेण्डा गोलमेच सभाया माध्यमं अन्तरिम सरकार दयेकाः न्हूगु संविधान निर्माणया नितिं ज्या गुगु कथं स्थापित यायेगु नापं मेमेगु दलतलिसे गुगु कथं सहलह ब्याकाः वनेगु धैगु खँ जूगु खः धकाः नं नेतातय्सं जानकारी बियादीगु दु ।