‘जि आङकाजी जुइत तयार’
येँ (झीगु स्वनिगः)
एमालेंया केन्द्रीय नेता राजेन्द्र श्रेष्ठं पार्टीपाखें तयार याःगु ७ प्रदेशया प्रस्ताव धैगु आदिवासी जनजाति, मधेसी नापं राज्यं बहिस्करणय् लाकातःपिं समुदायया भावनाया अःखः जूगु दावी यानादिसें तत्काल हे उकियात भिंकेगु ज्या मयात धाःसा न्हूगु हे पार्टी चायेकेगु जुइ धकाः ख्याच्वः बियादीगु दु ।
म्हिगः शनिवाः येँय् जूगु छगू साक्षात्कार ज्याझ्वलय् न्वंवासें वय्कलं अथे धयादीगु खः । बहुपहिचानया आधारय् ७ प्रदेश दयेकेगु धकाः पार्टीं तःगु प्रस्तावयात थःपिन्सं गुगु नं हालतय् मानेयायेगु जुइमखु धकाः न्ह्यथसें एमालेया नेता श्रेष्ठं धयादिल ‘जि एमालेया नितिं जन्म जूम्ह मखु । एमालें निस्कासन यात धाःसा जि आङकाजी जुइत तयार दु । ल्हाः तुति चिकाः एमालेय् च्वनाः च्वनेमाः धैगु मदु ।’
एमाले कांग्रेसं न्ह्यब्वःगु संघीयताय् वन धयादिसें वय्कलं आः पार्टीया नां हे नेकपा नेपाली कांग्रेस तःसां जिउ धकाः सुझाव नं बियादिल । एमाले खय् व आर्यतय्गु पार्टी जुइत्यन धयादिसें एमालेया केन्द्रीय नेता राजेन्द्र श्रेष्ठं यदि एमाले दुनेया आदिवासी जनजाति, मधेसी व राज्यं बहिस्करणय् लाकातःपिं समुदायया मागयात सम्वोधन मयासे पेलेयानाः वनीगु अवस्थाय् न्हूगु हे कथंया राजनीतिक दल दयेकाः वनेगुया मेगु विकल्प दैमखु धकाः नं स्पष्ट यानादिल ।
