नेकपा — माओवादीया थनिनिसें केन्द्रीय मुँज्या
येँ (झीगु स्वनिगः)
न्हू गठन याःगु नेपाल कम्युनिष्ट पार्टी—माओवादीया न्हापांगु पोलिट्व्युरो मुँज्या म्हिगः शनिवाः च्वंगु दु । येँया वुद्धनगरय् च्वंगु ज्याकुथिइ म्हिगः शनिवाः जूगु मुँज्याय् राष्ट्रिय भेलापाखें पारित राजनैतिक प्रतिवेदनयात अन्तिम रुप बिइगु नापं संगठन सम्वन्धी ज्यायात व्यवस्थित यायेत पार्टीया छ्याञ्जे सिपी गजुरेलं जानकारी बियादीगु दु ।
शुक्रवाः न्हापांखुसी नेकपा—माओवादीया च्वंगु स्थायी समितिया मुँज्यां गोलमेचसभाया नितिं पहल सुरु यायेगु धकाः याःगु निर्णययात म्हिगः शनिवाःया उगु पार्टीया पोलिट्व्युरोया मुँज्यां अनुमोदन याःगु दु ।
मुलुकय् ब्वलनाच्वंगु वर्तमान राजनीतिक सङ्क्रमणकाल याकनं अन्त्य यानाः निकास विइगु नितिं उपयुक्त माध्यम धैगु गोलमेचसभा जूगु निश्कर्ष पिकयाः उकिया नितिं पार्टीं तीब्र यायेगु धकाः स्थायी समितिं निर्णय याःगु खः । अथे हे असार २ देखि ४ गतेतकया उगु पार्टीया राष्ट्रिय भेलाय् न्ह्यब्वःगु प्रतिवेदन व विधानयात संशोधनया विषययात कयाः नं पोलिट्व्युरो मुँज्याय् सहलह जूगु खः ।
संशोधित विधान व प्रतिवेदनयात केन्द्रीय समितिया मुँज्यां पारित याइ । म्हिगः शनिवाःया मुँज्याय् कन्हय् निसें जुइगु केन्द्रीय समितिया मुँज्याया नितिं माःगु कथं एजेण्डा तकं तयार याःगु दु धकाः धाःगु दु । उगु पार्टीया न्हापांखुसी केन्द्रीय समितिया मुँज्या च्वनेत्यंगु खः ।
